Os futuros médicos apostan pola balneoterapia para reducir o exceso de fármacos

Son de sobra coñecidos os beneficios das augas termais para a saúde, que polas súas propiedades antioxidantes mesmo poden atrasar o avellentamento. Alumnos de Medicina compróbano de primeira man estes días en Mondariz, nunhas xornadas para promover a balneoterapia na prevención de diversas doenzas. 

Son alumnos de 5º curso de Medicina que complementan os coñecementos adquiridos na Cátedra de Hidroloxía Médica USC-Balnearios de Galicia cunha estancia nos propios balnearios. Esta fin de semana tocou o de Mondariz. E logo dunha sesión teórica co fisioterapeuta do centro, fan uso das instalacións termais. Experimentan dese xeito unha perspectiva distinta das doenzas e dos doentes.

"Despois de que na facultade nos falan de fármacos e medicamentos, descubrir estas terapias distintas, alternativas, é interesante porque non ves enfermidades, senón que te centras nos enfermos".

"Poder ter de técnicas alternativas, non baseadas na medicación, ou noutras que poidan ser agresivas, é moi interesante porque abre outras posibilidades de atención aos doentes".

"Sobre todo en pacientes xeriátricos, polimedicados, para doenzas como osteoporose, dores de articulacións, etc., igual van mellor os baños e e exercicios en piscina", comentan algúns dos alumnos participantes nas xornadas. 

A composición das augas termais ten efectos positivos sobre a saúde a nivel reumatolóxico, respiratorio ou dermatolóxico.

"Un importante compoñente antioxidante, especialmente indicado en pacientes xeriátricos, porque axuda a eliminación de radicais libres e contribúe a retrasar o avellentamento", sinala Laura Gómez, directora médica do balneario de Mondariz e organizadora das xornadas.

Adoitan ser os maiores os que máis usan os circuítos termais, aínda que é recomendable a calquera idade como terapia preventiva. Menos pílulas e máis baños relaxantes, unha receita sen contraindicacións.