Os inspectores da ONU chegan á central nuclear ucraína de Zaporijia

A misión do Organismo Internacional de Enerxía Atómica (OIEA), enviada para investigar a central nuclear ucraína de Zaporijia, controlada por tropas rusas, xa está nesa instalación, informou a axencia nuclear ucraína Energoatom.

Un portavoz do OIEA confirmou a chegada do equipo de inspectores internacionais.

"A misión do OIEA chegou á central de Zaporija", sinalou a Efe Fredrik Dahl, que viaxa co equipo que debe establecer cal é a situación na planta, a máis grande de Europa, e que foi sometida a ataques que puxeron en risco o seu funcionamento.

Segundo a axencia Interfax, o convoi da ONU, formado por nove vehículos, entrou no territorio da maior planta atómica de Europa ao redor das 14.15 horas (11.15 GMT).

O grupo de 14 expertos do OIEA, a axencia nuclear da ONU con sede en Viena, ten como misión avaliar a situación en Zaporijia, que foi tomada polo exército ruso hai máis de seis meses.

A central foi obxecto de bombardeos recentes que danaron algunhas das súas instalacións, e o OIEA leva meses advertindo do risco dun desastre nuclear e pedindo permiso para efectuar esta misión.

Hoxe mesmo un dos reactores da planta tivo que ser parado despois de que esta madrugada se produciran novos bombardeos e ataques na zona próxima e dos que Kíiv e Moscova se acusan mutuamente e que obstaculizaron a chegada da misión do OIEA á central nuclear.