Os pementos de Herbón chegan ao mercado cun mes de atraso debido ao tempo adverso

Son días de estrea para os pementos de Herbón no posto de Pilar na praza de Santiago. É un inicio algo atrasado, porque tanta chuvia e frío das últimas semanas frearon a evolución nos invernadoiros. De aquí é de onde están a saír os primeiros comercializados.

"Imos tarde", di Antonio, de Pementos Evangelina e Gómez. E preguntámoslle que canto tempo.
"Nos invernadoiros case un mes", responde, e engade: "Agora xa tiña que haber máis pemento do que hai. E ao aire libre aínda estamos empezando a poñer fóra, e a estas alturas xa tiña que estar plantado".

Así e todo, os deste produtor volven ser dos primeiros no mercado.

"Si, tamén os puxen a finais de xaneiro, e corrín moito risco. Houbo que transplantar algunha.
Púxenos cedo. Quedaron algo pequenos, pero agora están a desenvolverse. Pero hai que arriscarse tamén, porque, senón, nada tes", explica Antonio.

Polo de agora apenas collen oito quilos á semana, polo que o prezo vai de acordo coa oferta escasa do momento:

"A sete euros. Tiña que ser como pouco a oito, pero... a sete!
Cantos son por ese prezo?
A bolsa de pementos de Herbón vai por gramos; 400 gramos".

Mentres, na parroquia padronesa de Herbón aproveitan agora para poñer en marcha os cultivos ao aire libre do seu afamado pemento.