Os préstamos Next Generation, por María Loureiro

O Consello de Ministros acaba de aprobar este martes a addenda ao Plan de Recuperación pola que solicitará a Bruxelas os 94.000 millóns restantes do plan Next Generation, dos cales 84.000 deles son préstamos. 

Ata o de agora, España recibiu 37.036 millóns de euros, o equivalente ao 53 % do total que lle corresponde en forma de transferencias non reembolsables, que ascende a 69.528 millóns de euros do Plan de Recuperación Europeo.

Ao longo de 2023, o Plan prevé outros dous pagos por importe de 10.000 millóns de euros e 7.000 millóns de euros dos fondos europeos.

Tras isto, os desembolsos completaranse con tres pagos anuais previstos de 8.000 millóns de euros en xuño de 2024, 3.500 millóns de euros en xuño de 2025 e 4.000 millóns de euros en decembro de 2026. 

Durante estes meses, o Executivo mantivo reunións cos gobernos autonómicos, os grupos parlamentarios e os axentes sociais para a elaboración da addenda ao Plan de Recuperación, coa que se mobilizarán 7.700 millones de euros adicionais en transferencias e os 84.000 millóns de euros en préstamos, que se sumarán aos case 70.000 millóns de euros da primeira fase do Plan non reembolsables. 

Préstamos a empresas e sector privado

A verdadeira novidade nesta nova etapa son os préstamos a empresas e sector privado, que se concederán ao tipo de interese que obtén o executivo comunitario na emisión dos fondos Next Generation EU, ao que hai que engadir os gastos de xestión.

O tipo sempre será inferior ao do Tesouro, en cincuenta puntos, e, por suposto, ao da rede comercial. O prazo de amortización será de 30 anos e o risco de falta de pagamento soportarao a administración pública, que terá que devolver os fondos á Comisión Europea.

Pola súa parte, os Estados teñen de prazo para devolver a parte que corresponde aos préstamos reembolsables ata o 31 decembro do 2058. 

Pulo á industrialización nos ámbitos da enerxía, agroalimentación, industria, tecnoloxía e dixital

Con estes novos recursos e as transferencias adicionais, o Goberno pretende concentrar os investimentos e reformas no impulso da industrialización e autonomía estratéxica nos ámbitos enerxético, agroalimentario, industrial, tecnolóxico e dixital, reforzando os investimentos dos 12 proxectos estratéxicos (PERTE) xa aprobados e en marcha. 

O Instituto de Crédito Oficial (ICO) e a banca impulsarán as novas liñas de préstamo. Algunhas das cifras máis subliñables indican que haberá financiamiento por un total de 15.500 millóns, investimentos sostibles para empresas de todos os sectores e tamaños, entidades públicas e fogares, incluíndo especialmente as destinadas a favorecer a transición enerxética (redución de consumo, uso de fontes limpas etc.), o transporte sostible, ou a descarbonización industrial.

Uns 7.000 millóns postos á disposición de pemes e autonómos

Tamén se estiman uns 7.000 millóns postos á disposición de pemes e autonómos fundamentalmente a través de liñas clásicas de financiamiento do ICO. Tamén se avanzou que se incluirá na addenda un fondo de 2.500 millóns de euros para a "modernización e sustentabilidade" do sector turístico.

O resto do crédito nutrirá tanto as liñas ICO antes detalladas coma 12 fondos de investimentos ou o Mecanismo Rede (os ERTE ligados a formación). Dentro dos fondos de investimento, destacan os Fondos das Comunidades Autónomas.

Estes Fondos das Comunidades Autónomas estarán dotados con 20.000 millóns, que se complementarán con financiamento autonómico xestionado polo Banco Europeo de Investimentos (BEI). Este fondo servirá para que as comunidades autónomas poidan ofrecer créditos vantaxosos para investimentos en vivenda social, transporte sostible, xestión sostible, comercio, pemes, coidados e outros.

Con todo, o obxectivo é aproveitar as beneficiosas condicións dos créditos brandos que a UE concede ao Estado para facilitar financiamento barato a empresas e fogares nun marco en que as subidas de tipos de xuro restrinxiron á vez que encareceron os préstamos bancarios. 

En resumo, unha excelente oportunidade para moitos sectores económicos domésticos, sempre e cando se escollan ben os proxectos paraa financiar.