Os Reis Magos percorren as aldeas de Barbadás nunha visita anticipada

As súas maxestades iniciaron en Barbadás a súa expedición polo rural galego. Fixérono a bordo dos vehículos municipais. Unha sonora comitiva que ao longo da tarde foi visitando as distintas aldeas do concello.

"Preguntámoslles aos pais se se portaron ben durante o ano e dámoslles uns doces", explica Melchor.

"Imos visitando as aldeas e levámoslles agasallos aos nenos", engade Baltasar.

Coa axuda dos paxes reais, levaron tamén unha caixa de correo de última hora, para que os máis preguiceiros entregasen as súas cartas a tempo para a noite de Reis.

En cada nova parada, un grupo ansioso de cativos agardaba xa por eles.

Nunha delas, os veciños, agradecidos pola visita anticipada, mesmo agasallaron os Reis cun chocolate quentiño, para que reunisen forzas para seguiren a viaxe.