Os restaurantes de Sanxenxo pechan á unha da mañá para favorecer a conciliación
Os restaurantes de Sanxenxo pechan á unha da mañá para favorecer a conciliación
O descanso do mediodía fíxase para as 5 da tarde
O horario é efectivo dende esta fin de semana
Imaxe de arquivo
A maior parte dos establecementos de restauración de Sanxenxo pecharán á unha da madrugada para favorecer a conciliación dos seus empregados.
Esta decisión "pode ser moi positiva" para avanzar cara a unha hostalería "máis conciliadora e sostible", segundo dixo o presidente do Consorcio de Empresarios Turísticos de Sanxenxo, Alfonso Martínez.
Este horario será efectivo desde esta mesma fin de semana e, ademais do horario de cea, establecerá o peche ao mediodía ás cinco da tarde.
A medida, asegurou Martínez, busca "homologar os horarios de restauración aos que xa hai en moitos lugares de Europa", apostando por horarios que permitan aos traballadores conciliar e mellorar as súas condicións laborais, adaptándoas ás súas necesidades persoais.
Os responsables do sector turístico de Sanxenxo consideran que este pode ser un "cambio positivo" tanto para o público como para os profesionais do sector, animando a que o público se achegue a cear a unha hora máis temperá.
Esta decisión farana súa os establecementos que voluntariamente así o desexen, comunicando o cambio tanto aos seus traballadores como aos seus clientes e visitantes.
