Os seis primeiros tanques Leopard españois para Ucraína saen de Santander
Os seis primeiros tanques Leopard españois para Ucraína saen de Santander
Os seis carros de combate embarcaron canda outros 20 vehículos de transporte vía marítima cara a Polonia
Os Leopard 2A4 foron reparados e postos a punto na factoría de Santa Bárbara en Alcalá de Guadaira, en Sevilla
Outros catro están a ser rehabilitados para a súa entrega ao exército ucraíno nas próximas semanas
Carro de combate Leopard español en manobras
O primeiro envío de tanques Leopard españois xa saíu do porto de Santander con destino a Ucraína, segundo anunciou este sábado a ministra de Defensa, Margarita Robles.
Os seis carros de combate embarcaron esta noite xunto con 20 vehículos de transporte "e van xa en dirección a Ucraína, a onde chegarán dentro 5 ou 6 días", detallou a ministra en declaracións aos medios en Madrid.
Os seis Leopard 2A4 foron reparados e postos a punto na factoría da empresa Santa Bárbara en Alcalá de Guadaira, en Sevilla, e sometidos a probas de certificación por parte do Exército de Terra en Cerro Muriano, en Córdoba.
Unha vez superadas estas fases trasladáronos por estrada a Santander para ser enviados desde alí a Polonia, onde se recibe e distribúe toda a axuda militar que os países envían a Ucraína.
Trátase dos seis primeiros Leopard comprometidos polo Goberno de Pedro Sánchez, pero hai outros catro carros de combate que están a ser xa rehabilitados para sumarse tamén ao Exército ucraíno nas próximas semanas.
