Os sindicatos pídenlles aos partidos que aclaren que van facer coas reformas desta lexislatura

CCOO e UXT asinan un manifesto conxunto en plena precampaña para as eleccións xerais. Queren que os partidos que concorren a estes comicios aclaren as súas propostas en materia laboral e social.

"É obrigado que os partidos se pronuncien sobre a reforma laboral ou se se vai recuperar o contrato por obra".

Din que nesta lexislatura se acadaron importantes avances para os traballadores. Entre eles destaca a reforma laboral, o salario mínimo ou a revalorización das pensións.

"Situámonos en niveis europeos e iso é froito do diálogo e do acordo".

Os empresarios reclaman o seu papel nos acordos acadados nesta lexislatura e piden respectar os tempos electorais.

"Non imos xogar no campo electoral porque temos que estar no ámbito do diálogo social e de representatividad da empresa española".

O Goberno lembra que a reforma laboral é un dos compromisos coa Unión Europea derivados dos fondos de recuperación.

"É un proceso de modernizacións estrutural que non se debe parar".

O Partido Popular responde que o diálogo social será unha peza clave da súa proposta económica.

"Son propostas que formaran parte do noso programa electoral e que os españois coñecerán a onde queremos encamiñar o noso mercado laboral".

Os sindicatos defenden seguir traballando nos asuntos que quedan pendentes, como é o caso do estatuto do bolseiro, sen agardar o resultado das eleccións do 23 de xullo.