Veciños dunha rúa de Padrón piden que se limite o paso de vehículos para poder andar sen perigo
Veciños dunha rúa de Padrón piden que se limite o paso de vehículos para poder andar sen perigo
Din que a nivelación da calzada e a beiravía que se fixo na última reforma da rúa agravou o risco de atropelos
A situación é especialmente crítica nos puntos onde a vía é especialmente estreita e os coches pasan a rente das casas
A rúa de Santiago, a vía principal da barriada da Trabanca, ten un tráfico intenso porque é parte do trazado da estrada comarcal que vai de Padrón a Rois e Noia.
Con esa trasfega habitual, a convivencia entre coches e peóns resulta difícil. Circular por aquí é especialmente complicado á hora do cambio de quenda das industrias que hai máis arriba.
Os afectados din que todo empeorou cando se fixo a última reforma da rúa, e se puxo a beiravía ao mesmo nivel da calzada.
Algúns chegaron a poñer rodas diante da porta para que os coches manteñan a distancia.
Tras as sucesivas protestas veciñais, desde o Concello de Padrón din que están estudando como solucionar tanto as humidades que provocou a última reforma da rúa, como os problemas de seguridade que os veciños levan denunciando reiteradamente.
Entre os afectados hai disparidade de preferencias; uns queren que se limite a uso peonal agás para residentes e servizos, outros din que debería ser de sentido único e outros prefiren que se manteña o dobre sentido, pero con restricións de paso. Estes últimos piden, por exemplo, semáforos que enlentezan o tráfico e animen moitos condutores a ir por outras rutas alterativas.
No Concello contan con poder aplicar unha solución integral de cara ao verán, cando o tráfico pola rúa se reduce pola parada do transporte escolar e as vacacións nas empresas da zona. Esperan que para daquela poidan ter avaliado tamén que repercusión tería cada posible solución tanto no tráfico da rúa coma no das rutas alternativas.
