Os xabarís pasean polo centro da Coruña

Faltaban poucos minutos para a unha da madrugada cando os xabarís irromperon na céntrica praza de María Pita, na Coruña. "Íamos pechar e escoitamos uns ruídos, miramos e xa vimos os xabarís paseando pola praza", di un hostaleiro. "A miña reacción foi coller o móbil e gravar, porque despois cóntalo e non cho cren", comentan outro. 

Minutos antes xa os viran paseando pola contorna da Torre de Hércules. "Eu saín de adestrarme onte, contra as doce menos cuarto da noite, e había tres polos campos da Torre e foron polo paseo marítimo", comenta un veciño. 

Malia que xa non é estraño velos polas rúas, non deixan de sorprender: "Claro que sorprende, porque que cheguen a María Pita...", di un cidadán. "É que para chegar aquí tiveron que percorrer moitas rúas antes", corrobora outro. 

Hai quen sospeita de que viñeron facer a súa particular ruta gastronómica: "Ao mellor querían un pouco de polbo... Eles buscan comida...", asegura un hostaleiro. "Xa viñeron coller sitio para sentar ao mediodía aquí", chancea outro.

Uns tiran de ironía, pero a outros preocúpalles a situación: "É que se están coas crías, si poden ser perigosos". Tras esta primeira visita, os hostaleiros cren que os xabarís volverán a María Pita.