Pillan na allada unha muller nun monte de Ourense con artefactos incendiarios

Os traballos de extinción de incendios non cesan pero tampouco as investigacións sobre as súas causas. Nas últimas horas a Unidade de Investigación de Incendios Forestais da Consellería de Medio Rural sorprendeu na allada unha muller nun monte de Amoeiro con pastillas de acendido e un chisqueiro supostamente coa intención de orixinar un lume.

Os axentes da Xunta xa estableceran desde hai días un operativo de vixilancia na parroquia de Trasalba tras detectarse a existencia de actividade incendiaria.

Atoparon artefactos incendiarios nos sete fogos rexistrados na zona desde o 13 de agosto. A investigación realizada en conxunto con axentes da Policía Autonómica da xefatura de Ourense permitiu arrestar a muller e poñela a disposición xudicial como investigada.

A superficie afectada polos sete lumes non chegou a unha hectárea, grazas á rápida actuación dos servizos de extinción.

Esta operación súmase ás realizadas ao longo deste verán polos axentes da UIFO, que atoparon no distrito forestal de Vigo-Baixo Miño un artefacto incendiario e unha cabicha cun sistema de ignición, concibida para ser depositada no monte e prender lume de maneira retardada. Tamén acharon papeis de xornal acumulados no punto de inicio de dous conatos de incendio rexistrados no distrito forestal Caldas-O Salnés e unha pastilla de acendido noutro foco do distrito de Santiago-Meseta Interior.

Todos estes indicios avalan a intencionalidade dos lumes ao ser acendidos de forma premeditada.