Unidas Podemos pide máis medidas no plan contra os efectos da guerra

A finais de xuño caduca o plan contra os efectos da guerra, pero o presidente do Goberno, Pedro Sánchez, xa anunciou que vai prorrogarse tres meses máis, iso si, con cambios. A voceira do Goberno, Isabel Rodríguez, asegurou que están "avaliando como vai cada unha das medidas (...) e do que se trata é de actualizalo por se fosen precisos algúns axustes".

Dende Unidas Podemos xa meten presión e apuntan algúns cambios, por exemplo, no desconto de vinte céntimos por litro de combustible. Yolanda Díaz, vicepresidenta segunda e ministra de Traballo, cre que "non é correcto seguir subvencionando sen nesgo de renda e, ademais, seguir subvencionando combustibles fósiles".

A coalición pide tamén un bono de transporte público por dez euros ao mes e que as pensións non contributivas suban o 15 %. Tamén que se alongue todo o paquete ata finais de ano. Para o voceiro de Podemos, Pablo Fernández, "é tempo de ser ambiciosos, non nos conformamos coa prórroga das medidas existentes e cremos que hai que amplialas". Insta, ademais, o PSOE a "seguir o ritmo de Unidas Podemos".

Dende o Partido Popular acusan o Goberno de non negociar con eles. Segundo o alcalde de Madrid, José Luis Martínez-Almeida, "ao PP habitualmente formúlalle unha chantaxe: ou fas o que eu digo ou é que non queres chegar a ningún tipo de acordo". Na opinión do rexedor, "é moi difícil negociar con Pedro Sánchez porque pensa que a negociación consiste en que te rendas incondicionalmente ao que el quere".