Pontón acusa a Rueda de "non ter proxecto" e "traballar para as eléctricas e multinacionais"

A voceira do BNG, Ana Pontón, acusou na resposta á intervención do presidente da Xunta, Alfonso Rueda, de "non ter proxecto" e de presentar "un refrito de iniciativas xa presentadas".

Pontón criticou que o presidente da Xunta “renegue” da quita da débeda, que negociaran os nacionalistas co Goberno e que “o PPdeG aceptara”, ao seu xuízo, na votación dunha proposición non de lei na cámara galega.

"Que lle molesta, que a conseguimos o BNG?", preguntoulle para emprazar ao presidente para "poñer a Galicia por diante dos intereses do PP".

Pontón reprochoulle a Rueda que con esa actitude, “a Galicia así lle vai mal, con servilismo e submisión ao PP”, procederes que converteron ao actual mandatario no “presidente máis desleal da historia”.

Pontón referiuse a Rueda como o "presidente máis desleal da historia de Galicia". "Vostede non está a traballar para os galegos e para as galegas, vostede traballa para o PP e para as empresas amigas", censurou para acusar o presidente galego de "poñer a alfombra vermella" ás eléctricas para que "se forren roubando" aos galegos o vento.

"E este plan de espolio ten agora unha nova fase", sostivo para referirse á sociedade Recursos de Galicia como unha "cortina de fume" para tratar de acalar "toda a indignación social que hai co espolio eólico".

Precisamente a este respecto, acusou a Rueda de traballar para favorecer a implantación da multinacional Altri en Palas de Rei a pesar de que supoña unha “bomba ambiental no corazón de Galicia”.

“Quere facer o que fixo (Francisco) Franco hai 70 anos, está máis ancorado no pasado do que eu pensaba”, espetou Pontón a Rueda.

Por último, criticou os "anuncios de miles de vivendas" por parte da Xunta detrás dos que só hai "un boicot ás medidas valentes en favor da xente" como as que está a tomar o Concello de Santiago para regular as vivendas de uso turístico ou a proposta para declarar zonas tensionadas que contempla a lei estatal de vivenda.

Pontón ironizou co feito de que o máximo mandatario da Xunta pretenda convencer de que a vivenda é unha prioridade para o seu Goberno despois de que “a súa primeira medida” nesta materia fose “aumentar o 30 % o prezo da vivenda protexida”.

"Sempre elixe o lado equivocado", lamentou Pontón, que tamén se referiu á folga indefinida convocada polos traballadores da CRTVG nun contexto no que o PP "pretende dar unha nova volta de porca á manipulación de medios cunha lei para nomear a dedo ao próximo director e recortar a presenza do galego".