PortAmérica reúne 24 estrelas Michelin no palco gastronómico do festival

Pepe Solla, comisario do escenario Showrokin, comezou nunha pequena carpa e unha década despois o palco gastronómico de PortAmérica reúne un universo de estrelas Michelin, 24 en total. Unha oportunidade para os chefs participantes de xuntar dúas paixóns: cociña e música.

"A música é parte da vida. Eu cando cociño na miña casa sempre escoito música porque alimenta o corazón e a alma e dáche unhas vibracións que te levan onde precises", explícanos o laureado cociñeiro vasco Andoni Luis Aduriz, do restaurante Mugaritz.

A filosofía é a mesma que a da parte musical. Hai cociñeiros das dúas beiras do Atlántico e unha ampla representación de Galicia. Javier Olleros, de Culler de Pau, recoñece que teñen pouca oportunidade de acudir a concertos porque adoitan coincidir cos horarios de máis traballo.

"Aquí a verdade é que non perdes o foco. Cando cociñamos non podemos estar a outra cousa pero a verdade e que ter de fondo este son alegra a vida e cociñar faise máis doado"

Roberto Ruiz trouxo o festival os sabores de México.

"Vimos enchilar PortAmérica como cada ano. Xa tiñamos ganas de volver. Fixen unhas frautas de polo con guacamole e unha base de jalapeños".

Á marxe dos concertos programados nos dous grandes escenarios, no do Showrokin tamén hai actuacións sorpresa. Este venres cantou nel Rozalén.

Os que se acheguen a PortAmérica degustarán estes días 20.000 petiscos de alta cociña. Este ano como novidade e para responder a demanda do público no palco gastronómico tamén hai un posto de repostaría.