Prada anuncia a compra de Versace por 1.250 millóns de euros

A firma italiana de moda Prada anunciou este xoves a adquisición do 100 % de Versace por un valor de 1.250 millóns de euros, nunha operación que marcará un punto de inflexión no sector do luxo europeo.

A compra da icónica marca, ata agora pertencente ao grupo Capri Holdings, foi aprobada polos consellos de administración das dúas compañías. O peche definitivo da transacción está previsto para a segunda metade de 2025, e dependerá da obtención das aprobacións reguladoras necesarias.

Nun comunicado oficial, Prada detallou que o importe da compra se realizará “libre de débedas e efectivo” e poderá verse axustado en función do capital de traballo e a posición financeira neta de Versace no momento do peche. A operación tamén inclúe beneficios fiscais derivados das perdas acumuladas pola marca adquirida.

O presidente e conselleiro delegado do Grupo Prada, Patrizio Bertelli, mostrouse entusiasmado co acordo: “Dámoslle a benvida a Versace ao Grupo Prada e abrimos un novo capítulo para unha marca coa que compartimos un compromiso firme coa creatividade, a calidade do produto e unha rica herdanza cultural”.

Bertelli asegurou que Prada está preparada para impulsar unha nova etapa para Versace, mantendo a súa esencia creativa e autenticidade cultural. Ao mesmo tempo, a marca beneficiarase do apoio e coñecementos industriais de Prada, así como da súa experiencia no ámbito comercial e operativo.

Nos últimos anos, Versace sufriu perdas económicas nun contexto de desaceleración global do mercado de luxo, mentres que Prada conseguiu manterse e reforzar a súa posición no sector.