O Osasuna sorprende o Deportivo Abanca en Abegondo

No fútbol feminino, paso atrás do Deportivo Abanca no seu obxectivo de ascender á Primeira División. Perdeu en Abegondo fronte ao Osasuna. O equipo navarro levou o triunfo grazas a un espectacular gol de Lorena Herrera aos 37 minutos. Cun disparo lonxano superou por alto a Sampalo.

No segundo tempo, as deportivistas tiveron a mellor oportunidade para empatar, nun penalti que non puido transformar María Ruíz. É o primeiro tropezo do Deportivo na casa, onde gañara os nove partidos disputados. A derrota deixa ás coruñesas sen o liderado, que volve estar en mans do Levante Las Planas. Só o primeiro ascende de categoría.