Primeiro domingo de rebaixas, concorrido e con descontos de ata o 70 %

Atraídas polas promocións e tamén polos descontos, moitas persoas aproveitaron este domingo chuvioso para coñecer máis de preto as rebaixas deste ano. 

Algunhas acaban mercando. Outras precisan máis tempo, pero os propios comerciantes falan dun inicio das rebaixas bastante bo.

E iso que moitos establecementos iniciaron os descontos o 2 de xaneiro. Segundo unha enquisa da Asociación Española de Consumidores (Asescon), a media de gasto por persoa será de 135 euros.

Aínda que as rebaixas se prolongarán ata finais de febreiro o sector asegura que a meirande parte das compras se realizarán ao longo desta semana.

En Vigo, por exemplo, representantes da zona Príncipe auguran acadar mellores cifras que as colleitadas no Nadal, cando as vendas foron un 30 % máis baixas ca o ano anterior.