Prisión permanente revisable por matar unha vendedora da ONCE que lle reclamaba 200 euros
Prisión permanente revisable por matar unha vendedora da ONCE que lle reclamaba 200 euros
O home envolveu o cadáver nuns plásticos e comprou ladrillos, cemento e area para construír un habitáculo para ocultar o cadáver
![](https://img-g24-crtvg.flumotion.com/prog24/2022/20220218/supremo.png)
O Tribunal Supremo confirmou a pena de prisión permanente revisable imposta a un home que asasinou por asfixia o 19 de agosto de 2021 na súa vivenda unha vendedora de cupóns da ONCE que lle reclamaba unha débeda de 200 euros, e que logo emparedou o cadáver no patio da casa.
Nunha sentenza o Supremo desestima o recurso do condenado contra a resolución do Tribunal Superior de Xustiza de Castela-A Mancha, que confirmou a ditada pola Audiencia Provincial de Albacete tras a celebración dun xuízo con xurado.
O Supremo rexeita a pretensión do condenado de que se lle aplique a circunstancia atenuante de arrebato ao considerar o tribunal que se produciu "unha reacción colérica desproporcionada" do autor dos feitos que nese momento "non tiña alteradas as súas facultades mentais".
Ademais da prisión permanente revisable por un delito de asasinato o acusado, A.G.S., foi condenado a un ano de cárcere por furto e ao pago dunha indemnización de 170.000 euros aos familiares da vítima.
Segundo a sentenza, o acusado mantiña desde había anos unha amizade coa vítima porque coincidían nos locais onde ela vendía cupóns e algunha vez tomaran algo xuntos.
Os feitos ocorreron na data referida cando A.G.S. chamou a muller e propúxolle que fora á súa casa para pagarlle o diñeiro que lle debía duns cupóns e uns rascas que lle deixaba fiados.
Unha vez na vivenda despois de tomar unha cervexa o condenado pagou á súa amiga 50 euros que lle debía e pediulle uns rascas dos que levaba para a venda.
Cando a débeda superou os 200 euros ela pediulle que lle pagase, pero el díxolle que non tiña diñeiro, o que provocou unha discusión entre ambos.
Sempre segundo a sentenza, de forma sorpresiva e inesperada o home propinou un empuxón á muller, que vivía cos seus pais e tiña recoñecida unha minusvalía do 72 por cento que afectaba á mobilidade da parte dereita do seu corpo.
Tras o empuxón ela caeu ao chan e díxolle que o ía denunciar e ante o temor de volver ao cárcere onde cumprira unha condena A.G.S. abalanzouse sobre a muller poñéndose encima sen que esta puidese defenderse e colleuna coas mans polo pescozo ata que a asfixiou causándolle a morte.
Ao comprobar que estaba morta envolveu o cadáver nuns plásticos e levouno a un dos cuartos da casa.
Logo comprou ladrillos, cemento e area para construír un habitáculo nun almacén que había no patio da vivenda para ocultar o cadáver.