Degustacións gratuítas de peixe e marisco nos campus universitarios

Un posto de comida ambulante percorre estes días os campus das universidades galegas. Ofrece degustacións gratuítas de conservas de peixe e marisco co obxectivo de promover hábitos alimenticios saudables entre a comunidade universitaria.

A iniciativa A Matriculata, promovida por Anfaco-Cecopesca e apoiada pola Consellería do Mar, busca promover os produtos pesqueiros como resposta ao descenso do consumo destes alimentos entre a cidadanía, sobre todo entre os mozos.

Alfonso Villares, conselleiro do Mar, estivo presente no primeiro día de campaña e reiterou o compromiso do Goberno galego coas empresas do complexo mar-industria, que dá emprego a máis de 11.000 persoas, a maioría mulleres.

A través de A Matriculata, o camión ambulante Cata a lata percorrerá os principais campus universitarios de Galicia ofrecendo degustacións para achegar aos mozos á riqueza nutricional destes manxares e para amosar a súa versatilidade para a preparación de pratos fáciles, rápidos e nutritivos.

Entre as 11:00 e as 16:00 horas, os estudantes poderán gozar dunha variada selección de petiscos elaborados con conservas de peixe e marisco e recibirán un receitario gratuíto para replicar estas receitas na casa.

Ademais, contarase coa participación de recoñecidos expertos gastronómicos como Chema García (@elafarogastro) e Alberto Ribas (@Alivientoo) que estarán presentes para compartir os seus mellores consellos e trucos culinarios.

Calendario de ruta da Matriculata

• Luns 16 de setembro: Campus de Santiago de Compostela, Universidade de Santiago de Compostela.
• Martes 17 de setembro: Campus da Coruña, Universidade da Coruña.
• Mércores 18 de setembro: Campus de Lugo, Universidade de Santiago de Compostela.
• Xoves 19 de setembro: Campus de Ourense, Universidade de Vigo.
• Venres 20 de setembro: Campus de Pontevedra, Universidade de Vigo.
• Luns 23 de setembro: Campus de Vigo, Universidade de Vigo.