Os gandeiros de Ternera Gallega Suprema protestan ante a Deputación de Lugo

Os gandeiros de carne manteñen o pulso e continúan coas súas mobilizacións, convocados por Gandeiros Galegos da Suprema, para instar o Ministerio de Agricultura a revisar os criterios de repartición das axudas habilitadas para paliar as perdas provocadas pola seca, ademais de demandar medidas que contribúan a aliviar a difícil situación que están a atravesar as explotacións.

Ademais do retén que manteñen ante a Subdelegación do Goberno, ao redor dun cento de gandeiros, segundo a organización, concentráronse este venres ante a sede da Deputación Provincial de Lugo porque, segundo o presidente de Gandeiros Galegos da Suprema, Santiago Rego,  na institución están “moitos dos alcaldes que representan a moitos dos gandeiros” que se están mobilizando estes días. “O que queremos é que trasladen o noso malestar e as nosas demandas ao Goberno de España, porque sentimos discriminados en canto á repartición das axudas. Imos ver penalizados cunhas primas menores, a pesar de que imos ter que soportar un incremento dos custos de produción”, concluíu.