PSOE, Junts e Esquerra Republicana pechan o acordo para a lei de amnistía
PSOE, Junts e Esquerra Republicana pechan o acordo para a lei de amnistía
Aseguran que cubrirá todas as persoas vencelladas co proceso independentista e que é acorde coa Constitución e coas leis europeas
Os detalles coñeceranse este xoves
O PSOE, Junts e ERC chegaron este mércores a un acordo sobre a lei de amnistía para reforzar unha norma que, aseguran, cobre "todas as persoas vinculadas ao proceso independentista" e é "plenamente conforme coa Constitución, o dereito e a xurisprudencia europea e os mellores estándares europeos e internacionais.
![](https://img-g24-crtvg.flumotion.com/prog24/2024/20240306/ACORDO_AMNISTIA.png)
Á media tarde Pedro Sánchez xa daba por pechado o acordo con Junts para sacar adiante a lei de amnistía. Horas depois de avanzar, nunha conversa privada con xornalistas, que podería haber cambios no texto para garantir o amparo a todos os independentistas implicados.
Durante a súa visita oficial ao Brasil, evitou confirmar se se vai modificar a consideración de terrorismo, o principal escollo para amnistiar a Carles Puigdemont.
Pedro Sánchez, presidente do Goberno: "Xa o verán, quedan poucas horas para comprobalo. O importante é que vai haber lei e que vai ser plenamente constitucional e acorde co dereito europeo".
Tamén Junts e Esquerra daban por pechado o acordo durante esta xornada.
"Se o acordo satisfai todas as partes será porque é un bo acordo", dixo Teresa Jordà, de ERC.
"Hai unha amnistía por diante. E a quen non lle guste que aguante", dixo Josep LLuis Claries, de Junts.
Nun comunicado conxunto, as tres formacións sinalan que acordaron unha emenda transaccional a partir das emendas que se mantiñan vivas, pero non explican o seu contido e se finalmente os delitos de terrorismo quedan baixo o paraugas da amnistía.
Segundo apuntan, os detalles do acordo, ao que se chegou "tendo en conta as directrices do dereito constitucional, europeo e internacional e o informe preliminar da Comisión de Venecia", daranse a coñecer este xoves antes da reunión da Comisión de Xustiza do Congreso, que debe aprobar o ditame da lei.
O PP arremeteu duramente contra o acordo. Anuncia que o combaterá "nas institucións e nos xulgados" e veo como unha proba de que ademais da "corrupción económica", o PSOE recorre á "corrupción política" para seguir no poder.
O presidente da Generalitat de Cataluña Pere Aragonès celebrou o "acordo necesario" entre PSOE, ERC e JxCat sobre a lei de amnistía anunciado esta noite: "Coa amnistía, gaña a democracia", afirmou en X.
Una llei crucial i sòlida. Un acord necessari que celebro enormement, molt en especial per tots els que avui se senten una mica més alleujats. Queda camí, i no serà fàcil, però avui estem més a prop de deixar enrere la repressió. Amb l'amnistia guanya la democràcia.
— Pere Aragonès i Garcia 🎗 (@perearagones) March 6, 2024
O negociador de Sumar e candidato dos comúns ás eleccións europeas Jaume Asens celebrou tamén o acordo.
Con este pacto, dixo, gaña a xustiza fronte ao "odio, a incomprensión, o lawfare e a vinganza".
Hi haurà llei d’amnistia. Avui guanya el diàleg, la justícia, el dret i la política enfront de l’odi, la incomprensió, el lawfare i la venjança. Enhorabona a tots i totes els qui han ajudat a fer possible aquest nou inici.
— Jaume Asens (@Jaumeasens) March 6, 2024