Puigdemont denuncia a Llarena polo "atraso inxustificado" para resolver o recurso sobre a amnistía

O avogado do expresident catalán Carles Puigdemont presentou unha denuncia ante o CXPX contra o maxistrado do Tribunal Supremo Pablo LLarena por "desatención e o atraso inxustificado e reiterado" na tramitación e resolución dos recursos, ante a súa decisión de non aplicarlle a amnistía.

O pasado 1 de xullo Llarena rexeitou perdoar o delito de malversación que atribúe a Puigdemont e aos exconsellers Toni Comín e Lluis Puig e acordou manter vixentes as ordes nacionais de detención, unha decisión que foi recorrida polas defensas, a Avogacía do Estado e a Fiscalía unha semana máis tarde.

No escrito, ao que tivo acceso EFE, o letrado Gonzalo Boye considera que o xuíz "incorreu nunha infracción disciplinaria" por excederse "con creces" e "incumprido reiteradamente" o prazo legal previsto na Lei de Axuizamento Criminal para a resolución dos recursos de reforma, que ten que resolver o propio xuíz, a quen reprocha a súa "pasividade intencional".

Segundo o avogado de Puigdemont, tendo en conta as datas en que se interpuxeron os recursos de reforma "deberían terse resolto fai máis dun mes", durante a primeira metade do mes de xullo, algo que non ocorreu "sen que pareza existir razón algunha que o xustifique".

Ademais, considera que "as circunstancias resultan especialmente graves" porque a lei de amnistía debe ser obxecto de tramitación preferente e urxente, o que afecta os recursos presentados, máis aínda cando as resolucións do xuíz inclúen restricións á liberdade de circulación de Puigdemont e do resto de procesados.

Por iso, acusa o xuíz de "dilatar o acceso" dos seus defendidos á Sala do Penal do Tribunal Supremo, que ten que resolver os recursos de apelación, e ao Tribunal Constitucional, onde pensa acudir en amparo.

Sostén ademais que "a inobservancia dos tempos legalmente establecidos durante o exercicio das funcións ou competencias xudiciais" é considerada unha falta grave.

E engade que Llarena solicitou deixar sen efecto a súa licenza de vacacións "co anhelo notorio de supervisar a captura" de Puigdemont, o que, "ademais de poñer de manifesto o malicioso da dilación", indica que "non existe razón xustificada de ningunha clase para non resolver dentro do prazo legal" os recursos.