Puente sitúa en 2027 a conexión ferroviaria do porto exterior da Coruña co Eixo Atlántico

O ministro de Transportes, Óscar Puente, sinalou este luns que a conexión ferroviaria entre o porto exterior da Coruña, o Eixo Atlántico e a rede de alta velocidade estará en funcionamento en 2027. 

Puente activou a voadura que completou a escavación do túnel máis longo da ligazón ferroviaria ao porto exterior, situado en Punta Langosteira, en Arteixo. O túnel, con 3.738 metros de lonxitude, forma parte dun proxecto con outras dúas perforacións, unha xa realizada de 774 metros e outra pendente de facer con 743. Trátase dun túnel de case 5,3 quilómetros nun trazado de pouco máis de 6 quilómetros.

As obras, empezadas en 2022, está previsto que estean rematadas en xuño de 2026, seguindo co límite de prazo do fondo europeo de 124,8 millóns de euros que as financia. O ministro subliñou a cooperación entre administracións que levou a avanzar con esta obra, que se enmarca dentro dun obxectivo xeral de lograr un aumento do tráfico de mercadorías a través do tren no conxunto do Estado, cun 4 % actual fronte ao 17 % de media europea.

Os dous túneles xa realizados permiten a conexión do porto exterior da Coruña coa rede ferroviaria da cidade herculina, polo que queda por executar o terceiro. Este último, aínda pendente de estudo informativo, enlazará directamente co sur e unirá as instalacións marítimas coa vía do Eixo Atlántico que vai cara a Santiago sen necesidade de realizar ningún cambio de sentido.

Puente defendeu o compromiso do Goberno coa Coruña e exemplificouno con outras actuacións, como o concurso internacional de ideas dentro de Coruña Marítima, para definir os usos da área do porto interior que queda baleira co seu traslado a Langosteira. Transportes achegará 2,2 dos 3,3 millóns de euros de orzamento deste proxecto.

"O obxectivo é chegar ao 10 % de mercadorías por transporte ferroviario en España antes do ano 2030. Somos o país da UE que ten un menor tráfico de mercadorías por tren. Só un 4 % fronte ao 17 da media europea" explicaba Óscar Puente.

Desde a Xunta de Galicia agardan que estas obras se poidan completar. "Para darlle máis sentido á saída de mercadorías deste porto, a transformación da vía entre A Coruña, Betanzos e Lugo onde se atoparían as mercadorías que se poidan mover desde o porto de Ferrol. Eu Agardo que teñamos novas axiña", reclamaba o conselleiro de Presidencia, Diego Calvo.

En relación coa humanización da avenida Alfonso Molina, a principal vía de acceso á cidade, lembrou que supón un investimento de 28 millóns de euros e conseguirá un "ritmo máis pausado cun deseño máis agradable" en toda a zona.