Puigdemont pecha a etapa da "resistencia" e chama a "xogar un novo partido"

O expresidente catalán Carles Puigdemont deu por pechada a etapa da "resistencia", iniciada tras a declaración unilateral de independencia de hai sete anos, e chamou a Junts per Catalunya a "saír dos cuarteis de inverno" e comezar a "xogar un novo partido".

Foi na clausura do congreso nacional do seu partido celebrado esta fin de semana en Barcelona, onde recuperou a presidencia do partido, desprazando a Laura Borràs tras confeccionar unha executiva á súa medida, avalada por 2.552 militantes, o 90 % dos que votaron.

No seu discurso, emitido por videoconferencia, pois segue instalado en Waterloo (Bélxica) ao non se lle aplicar a amnistía, dixo que o 27 de outubro de 2017 comezou "un camiño incerto e difícil" e, con todo, "irrenunciable" para Junts.

"Nada volveu ser igual desde entón e nada pode facerse ignorando esa realidade, escondéndoa ou borrándoa da historia", engadiu.

Críticas aos socialistas

Puigdemont arremeteu contra os socialistas por "sacar proveito da represión" e advertiulles de que esa irresponsabilidade "non foi nunca reparada, por moitas toneladas de cal viva de normalidade que queiran verter".

Censurou, neste sentido, que "o Gobern máis españolista e hostil a toda idea de soberanía" reclame a lexitimidade coa que conta, malia non respectar o PSC no seu momento "a lexitimidade do Govern independentista" que encabezaba no 2017.

Tamén arremeteu contra o "monopolio asfixiante dun único partido en todas as institucións", nun momento no que os socialistas gobernan en España, Cataluña e cidades do tamaño de Barcelona.

Junts, a mellor ferramenta

Puigdemont situou a Junts como a "mellor ferramenta" para encarar esta "nova etapa política" e avanzar cara á independencia, e animou a "abrir máis o partido", incorporando perfís de tradicións diversas pero vinculados ao catalanismo.

"Todo un país está a esperarnos", concluíu.

O expresident alertou ante un contexto marcado polos "aires de populismo extremadamente perigosos", das guerras en Ucraína e Oriente Próximo, o auxe da intelixencia artificial ou as consecuencias aínda visibles da pandemia.

Ao comezo do seu discurso, o president agradeceu a Borràs (perdedora do pulso interno mantido co secretario xeral, Jordi Turull, nos últimos anos) a súa "xenerosidade" por aceptar presidir a fundación do partido e defendeu que ela é "a persoa idónea" para facelo.

Asistentes á clausura

Á clausura do congreso asistiron o presidente do PNV, Andoni Ortúzar, o deputado de Bildu Jon Iñarritu, o membro da dirección do BNG Rubén Cela e representantes de sindicatos e patronais.

Por parte de ERC, fixo acto de presenza o presidente do grupo no Parlament, Josep Maria Jové, e do PSC, o seu secretario da área de Política Municipal, Implantación e Territorio, Joaquín Fernández.