Queixas veciñais en Ferrol pola falta de iluminación pública en varias zonas

Nas aforas de Ferrol e na contorna do hospital Arquitecto Marcide son varias as zonas onde moitos veciños viven en penumbra. En canto chega a noite todo se volve moi complicado. O roubo dos cables da iluminación pública repítese en Santa Icía, San Pedro ou Santa Cecilia.

Un dos lugares máis afectados é A Pallota, a carón do parque comercial. Os veciños quéixanse do abandono, xa que a situación vén de lonxe. Temen que o perigo derivado da combinación das estreitas beirarrúas, a circulación dos vehículos e a falta de visibilidade nos pasos de peóns poida traer tráxicas consecuencias.