Rompe a coalición de goberno en Alemaña e Scholz pedirá en xaneiro un voto de confianza no Parlamento

O chanceler alemán, o socialdemócrata Olaf Scholz, anunciou este mércores a ruptura da coalición de Goberno de socialdemócratas, verdes e liberais, tras destituír o ministro de Finanzas, o liberal Christian Lindner, e pedirá un voto de confianza ao Parlamento o 15 de xaneiro, tras o cal poderían celebrarse eleccións anticipadas en marzo.  

"Pedín ao presidente de Alemaña agora mesmo o cesamento do ministro de Finanzas. É un paso para apartar o noso país dos danos. Fai falta un Goberno capaz de actuar e de tomar as decisións necesarias para o noso país", afirmou Scholz nunha comparecencia en Berlín.

O chanceler explicou que, no curso das reunións entre os socios de coalición convocadas para tratar de liquidar a crise ocasionada por diverxencias en política económica e financeira, presentou ao líder liberal unha proposta para impulsar a economía xermana que contiña tamén elementos favorecidos por Lindner.

Con todo, o ministro de Finanzas non mostrou disposición ao compromiso, afirmou Scholz, que acusou a Lindner con termos tallantes de "egoísmo" e "irresponsabilidade".

"Non hai unha base de confianza para seguir cooperando", asegurou o chanceler, que enumerou diversas situacións nas que o líder liberal torpedeou segundo el o labor do Executivo de coalición nos últimos tres anos.

Pero, precisamente ante a vitoria electoral do candidato republicano Donald Trump e dunha situación na que a guerra en Ucraína e a situación en Oriente Próximo ameazan a seguridade de Europa, fai falta certeza e seguir investindo en "seguridade e fortaleza", afirmou.

Scholz aseverou que non está disposto a elixir entre o apoio a Ucraína e o investimento en seguridade, por unha banda, e o Estado de benestar polo outro, como segundo el lle esixía Lindner, e falou dun falso dilema que é "veleno" para a democracia.

O chanceler destacou que Alemaña é un Estado forte e menos endebedado que outros países industrializados, polo que é posible recorrer ao mecanismo constitucional que permite levantar a vixencia do freo da débeda en situacións de emerxencia.

"O Goberno non só ten o dereito de actuar, actuar é o seu deber", salientou, avogando por recorrer a un endebedamento extraordinario para poder realizar todos os investimentos necesarios, o que foi desde o inicio da lexislatura unha liña vermella para os liberais.

Cuestión de confianza e diálogo coa oposición 

Scholz explicou que aspira a que ata o Nadal o Parlamento complete o trámite parlamentario de todos os proxectos de lei do Executivo de carácter urxente, o cal tamén debería incluír, en teoría, o orzamento para 2025.

Despois, na primeira sesión do novo ano someterase a unha cuestión de confianza para que os deputados decidan "se abren o camiño a eleccións anticipadas", as cales, segundo dixo, se producirían como moi tarde a finais de marzo.

Ademais, Scholz avanzou que buscará o diálogo con Friedrich Merz, o xefe da oposición democristiá, que lidera nestes momentos as enquisas de intención de voto, e ofreceralle cooperar nas cuestións fundamentais da economía e a defensa.

"A economía non pode esperar a unhas eleccións anticipadas. Fai falta claridade", afirmou.

O chanceler concluíu a súa comparecencia cunha alegación pola capacidade de compromiso e puxo os EUA, un país "profundamente dividido", como exemplo que cómpre evitar.

"Teremos que lidar con resultados que requirirán cooperación e compromiso", dixo, apuntando a unha posible cooperación entre conservadores e socialdemócratas.

Lindner: "Scholz xa non estaba interesado nun acordo viable, senón en facer unha ruptura calculada da coalición"

O xa exministro de Finanzas de Alemaña Christian Lindner acusou este mércores o chanceler de forzar unha "ruptura calculada" da coalición. "A súa declaración desta tarde, coidadosamente preparada, demostra que Olaf Scholz xa non estaba interesado en alcanzar un acordo que fose viable para todos, senón nunha ruptura calculada con esta coalición", sinalou.

Nunha comparecencia ante os medios, Lindner asegurou que a decisión de Scholz "conduce a Alemaña a unha fase de incerteza", xa que provocará, probablemente, a celebración de eleccións anticipadas a finais de marzo.

O presidente dos liberais recalcou que el propuxera reducir a burocracia e a presión fiscal, acometer unha política climática e enerxética pragmática, realizar un maior control da inmigración e fortalecer a innovación. Propostas, lamenta, que "nin sequera foron aceptadas polo Partido Socialdemócrata (SPD) e os Verdes como base de consulta".

Segundo Lindner, Scholz "leva moito tempo sen recoñecer a necesidade dun novo espertar económico no noso país e restando importancia ás preocupacións económicas dos nosos cidadáns".

O líder dos liberais afirma que as contrapropostas do chanceler son "pouco ambiciosas e non contribúen a superar a debilidade fundamental do crecemento do noso país" e recalca que o seu partido segue disposto a asumir a responsabilidade e loitará "por facer o mesmo noutro goberno o ano que vén".

A ruptura do Executivo alemán é un "erro", segundo o vicechanceler verde Robert Habeck

O vicechanceler e ministro de Economía, o verde Robert Habeck, considera un "erro" a ruptura da coalición de Goberno alemá por mor da expulsión do Partido Liberal (FDP).

Segundo Habeck, había posibilidades de pechar o buraco de 12.000 millóns de euros nos orzamentos de 2025, un dos factores que levaron á crise entre socialdemócratas, verdes e liberais. Ao seu xuízo, Alemaña debería mostrar "unidade e capacidade de actuación".

Habeck afirmou que os verdes seguirán traballando a prol dunha Alemaña como factor de estabilidade en Europa, na que a protección do clima sexa vista como unha vantaxe económica.

O líder conservador insta a Scholz a someterse a unha cuestión de confianza de inmediato

O líder da Unión Cristianodemócrata (CDU), Friedrich Merz, instou este xoves o chanceler alemán Olaf Scholz a someterse a un voto de confianza como moi tarde a semana que vén, e non o 15 de xaneiro, como anunciou onte o xefe de Goberno tras darse a coñecer a ruptura do goberno de coalición.

Nunha comparecencia ante a prensa, Merz afirmou: "Non hai ningunha razón para esperar a xaneiro do ano que vén para pedir un voto de confianza". Subliñou que a coalición de goberno formada por socialdemócratas, verdes e liberais "xa non ten maioría" na cámara baixa.