Rato explota contra a Avogacía do Estado e Anticorrupción por "tomalo por parvo"

O exvicepresidente do Goberno Rodrigo Rato explotou contra a Avogacía do Estado e a Fiscalía Anticorrupción no xuízo que se segue pola orixe da súa fortuna, e asegurou que é "indignante e tómannos por parvos" cando afirman que residía en España durante o seu mandato como director xerente do FMI.

Respondeu ás preguntas da súa avogada, María Massó e rexeitou contestar á Fiscalía Anticorrupción e á Avogacía do Estado, que segundo el manexaron documentos e correos electrónicos que non debían figurar na causa.

Explicou en ton desafiante que a residencia do director xerente do FMI e de todos os seus funcionarios está en Washington, onde está a sede do organismo, e os emolumentos cobrábanse a través da propia entidade bancaria do organismo. Pero as acusacións sosteñen que a súa residencia fiscal estaba en España, como demostraría que durante eses anos, entre 2004 e 2007, fixo as correspondentes declaracións de IRPF en España.

Sobre iso, Rato, ao que se lle atribúen once delitos fiscais, branqueo de capitais e corrupción nos negocios e enfróntase a unha petición de penas que podería alcanzar os 70 anos de cárcere, relatou que o asesor fiscal da familia fixo as declaracións da renda por inercia, e admitiu que non foi unha boa idea.

En todo caso, el, como todos os directores xerentes do FMI, tiña a súa residencia fiscal en Washington, e para probalo achegou á causa recibos e notas dos colexios dos seus fillos, así como o documento que reflicte que se deu de baixa do padrón en España. Tamén tivo unha conta nunha entidade bancaria para facer fronte aos recibos de luz ou recollida de lixos durante a súa estancia, o que proba que a súa residencia fiscal era Washington, como foi sempre para os seus antecesores e para os seus sucesores.

Respecto dos fondos que presuntamente mantivo no estranxeiro tras acollerse á amnistía fiscal, Rato remontouse a 1968, cando o seu pai pagou "unha multa considerable" por ter diñeiro fóra de España, pero esa multa "non o obrigou a repatrialo". O seu pai faleceu en 1998 e a súa nai enfermou e xa entre 2003 e 2004 el e os seus irmáns decidiron que tiñan que "tomar decisións", tras o cal el se ocupou do diñeiro que había en Suíza, e iso implicou "recibir a sociedade, que estaba creada".