Recadan fondos para axudar unha familia á que lle ardeu a casa enteira

Veciños da parroquia de Santeles, na Estrada, iniciaron unha campaña de recadación para a familia afectada por un incendio na súa vivenda na madrugada do 10 de marzo. A solidariedade da veciñanza, coa colaboración de Cáritas e o Concello da Estrada, prentenden axudar a esta familia a recuperar a súa vida.

Un mes despois e así está a casa que ardeu por completo o pasado 10 de marzo na aldea de Patanín, na parroquia estradense de Santeles. Os efectos do lume aínda se poden ver hoxe. As lapas devoraran por completo a vivenda, deixando as dúas mulleres que aquí vivían sen nada.

Recordos, bens e toda unha vida que en cuestións de minutos desapareceu. Por isto mesmo, polo dramático da situación, a solidariedade dos veciños non se fixo esperar.

"Ao que pasaron unhas horas xa comezaron os veciños a preguntar se precisaban algo, roupa ou vivenda. Elas teñen unha irmá e filla aquí preto, polo que casa polo de agora teñen", explica Mari Carmen Durán, da Asociación de mulleres rurais de San Xoán de Santeles.

Así naceu a campaña que hai uns días se puxo en marcha grazas á iniciativa da asociación de mulleres e dos veciños, baixo o lema "Axuda a familia Costoya Otero".

"Foron moitos os veciños que preguntaban, tamén de fóra da parroquia, e entón abrimos unha conta para poder axudarlles a elas", di Susana García.

Engade Mari Carmen: "O Concello da Estrada recomendounos que o fixésemos a través de Cáritas, pois eles están preparados para facelo e decidimos que o xestionasen".

Todos os que queiran colaborar ou solicitar información poden facelo en Cáritas ou no Concello da Estrada.