Rescatados de noite en pleno monte en Gondomar

Gozaban dun tranquilo paseo por este monte Galiñeiro pero atrapounos a noite e acabaron sendo rescatados pola Garda Civil. Pero ata aquí tamén se desprazaron o GES do Val Miñor e a policía local.

Aínda que non precisaron asistencia sanitaria, quedaron cun bo susto que tardarán en esquecer. De feito, este monte é un lugar moi frecuentado por sendeiristas e a súa orografía mudou moito dende os incendios de hai sete anos.

Por iso cómpre ter en conta sempre unha serie de recomendacións á hora de adentrarnos no monte. Levar lanterna, se é a do móbil cómpre saber se temos bastante batería. Levar o noso teléfono coa localización na que estamos e moi importante, levar calzado cómodo e roupa ben visible. Non é o mesmo un rescate a plena luz do día que cando comeza a remitir a luz.

Precisamente a localización móbil dada por un dos adultos facilitou o seu rescate, que durou case dúas horas. Precisamente neste monte hai quince días o helicóptero pesca un rescatou un sendeirista que quedou ferido tras unha caída.