Restricións ao tabaco de quentar: Sanidade incluirá advertencias nas etiquetas e prohibirá os aromas

O ministro de Sanidade José Miñones informou este luns da inclusión de advertencias sanitarias nas etiquetaxes do tabaco de quentar, como teñen o resto de formulacións de tabaco, e a prohibición dos seus aromas característicos. Así mesmo, trasladou aos conselleiros do ramo no Consello Interterritorial do Sistema Nacional de Saúde (CISNS) o seu compromiso na modificación do real decreto de 2017 para a transposición da directiva europea sobre a regulación do tabaco de quentar. 

Dende o Ministerio de Sanidade sinálase que, coa chegada desta medida, dáse un paso importante na protección da saúde, que se complementa con outras medidas "como a incorporación dun segundo medicamento financiado para deixar de fumar". 

Trátase de Recigarum, cuxo principio activo é a citisiniclina, e súmase ao Todacitán como segundo medicamento financiado polo Sistema Nacional de Saúde destinado a fumadores de polo menos 10 cigarros ao día que intentasen abandonar o hábito no último ano. Poderán iniciarse con este fármaco que promete deixalo definitivamente en 25 días.

O obxectivo do Goberno, subliñou Miñones, é conseguir unha xeración "libre de fume" en 2030, comezando por regular estritamente o uso de vapeadores entre os menores. Ademais, no CISNS aprobouse a repartición de 75,3 millóns ás comunidades autónomas, cuxo groso (68 millóns) se destinará ao Plan de Saúde Bucodental que amplía a carteira de servizos e mellora as prestacións bucodentais a 13 millóns de cidadáns.

Este plan bucodental estende a súa cobertura a nenos de 0 a 14 anos, embarazadas, pacientes con cancro de cabeza e pescozo, adultos con discapacidade intelectual e persoas con enfermidades neuromusculares. A esta partida, súmanse 2,8 millóns destinados a enfermidades raras e neurodexenerativas, incluída a ELA.

Por último, no foro celebrado telematicamente cos novos conselleiros de saúde, informouse do repartimento de dous millóns de euros ás comunidades autónomas para impulsar o plan de información do Sistema Nacional de Saúde e 2,5 millóns para, explicou Miñones, mellorar a autosuficiencia en plasma no marco da estratexia nacional. Ademais, valorou o encontro e a unanimidade na aprobación de todas estas medidas.