O Goberno mételle presión á Xunta para que eleve o nivel de emerxencia

O delegado do Goberno en Galicia, Pedro Blanco, pediu este martes á Xunta que "asuma dunha vez por todas as súas responsabilidades e eleve o nivel de emerxencia ao 2 para que o Goberno poida colaborar con medios estatais" na retirada dos pellets de plástico que están a chegar ás costas galegas.

“Por agora vese que consideran que poden facer fronte eles sós. Eu creo que é un erro e tentaría buscar o máximo apoio para responder á chegada de material de plástico”, engadiu o delegado do Goberno.

Sobre a apertura de dilixencias por parte da Fiscalía de Medio Ambiente, dixo que "parece que ve indicios de toxicidade nese material", aínda que "haberá que esperar á investigación".

"O que está claro é que o plástico é contaminante e non é comestible. A contaminación do plástico no mar é un dos grandes problemas aos que nos enfrontamos", engadiu.

"Segundo a Xunta, non son tóxicos", dixo Pedro Blanco, pero "gustaríanos que compartise connosco ese informe para facer un seguimento exhaustivo do impacto nas especies". 

Ribera ve un erro rexeitar a axuda estatal

 A vicepresidenta terceira e ministra para a Transición Ecolóxica, Teresa Ribera, criticou a Xunta de Galicia por non pedir axuda na crise dos pellets na praias galegas e asturianas e mostrou a súa certeza de que "a xestión sería diferente" se non houbese "precampaña electoral".

Nunha entrevista na Cadena Ser, Ribera fixo fincapé en que rexeitar a colaboración do Goberno central é un erro, polo que ofreceu ás autoridades rexionais a súa total "dispoñibilidade para axuda".

Feijóo: "O que é tóxico é responsabilizar a Xunta e tomar os galegos por pouco intelixentes"

O presidente do PP, Alberto Núñez Feijóo, reprochou ao Goberno central que se responsabilice a Xunta de Galicia da vertedura de pellets plásticos. Para Feijóo, os microplásticos "non son tóxicos", o que é "tóxico é a utilización política que se está facendo dunha vertedura nas costas portuguesas que o mar trouxo ás costas galegas e, de momento, ás costas asturianas".

"O que é tóxico", continuou Feijóo, é "responsabilizar a Xunta por parte dun Goberno, que, parece ser, "tiña información desde o 20 de decembro e non se pon en contacto coa Xunta ata o 3 de xaneiro".

Para o líder da oposición, tamén "resulta tóxico e perigoso tomarse aos galegos por persoas pouco intelixentes". "Pensar que os galegos non temos memoria, temos moita memoria e sabemos o que fixo o Partido Socialista contra o Partido Popular cando gobernaba e houbo unha vertedura tóxica e perigosa como foi o Prestige", argumentou nunha entrevista en Onda Cero.

O BNG cre que a Xunta pode estar “prevaricando” se non eleva o nivel de alerta

A portavoz nacional do BNG e candidata á presidencia da Xunta, Ana Pontón, sostivo este martes que a Xunta de Galicia “pode estar prevaricando” se non eleva o nivel de alerta ante a vertedura de pellets.

Nunha visita ao parque natural de Corrubedo xunto ao alcalde de Ribeira, Luis Pérez, para avaliar o impacto ambiental dos residuos plásticos, Pontón reiterou que se dan todas as condicións necesarias para elevar o nivel de alerta en canto a contaminación.

Segundo a líder do Bloque, a Xunta non aumenta o nivel de alerta por unha cuestión electoral a pesar de que sabe que a administración autonómica non conta con “os medios suficientes para poder retirar de maneira rápida esta marea plástica”.

Besteiro acusa a Rueda de "ocultar" o problema

O candidato do PSdeG á presidencia da Xunta, José Ramón Gómez Besteiro, instou o Goberno galego a elevar o nivel de alerta acusou o titular do Executivo autonómico, Alfonso Rueda, de "ocultar" o problema.

En declaracións aos medios na Illa de Arousa, Besteiro lembrou que hai un mes que Rueda, tamén candidato do PPdeG á reelección, "convocou eleccións". Tras iso, sinalou que "foi de vacacións e ocultou o que estaba a ocorrer no litoral".

"En definitiva, un mes sen pisar nin unha soa praia do noso litoral, un mes que reflicte unha catástrofe non só ambiental, senón tamén institucional", sostivo.

Neste sentido, asegurou que el non culpa a Xunta da marea plástica, senón que acusa o presidente e ao Goberno galego de "ausencia, incompetencia e de mentir aos galegos".

O eurodeputado Casares solicita unha reunión co comisario de Medio Ambiente

O eurodeputado socialista galego, Nicolás González Casares, solicitou unha reunión co comisario europeo de Medio Ambiente, Virginijus Sinkevicius, para analizar a situación.

Ademais, presentou unha pregunta escrita á Comisión Europea no pon de relevo o potencial contaminante destes compoñentes. "Lamentablemente, ante este grave problema o Goberno galego mantivo unha actitude pasiva, con graves carencias de información ás autoridades locais e total descoordinación", denuncia.

González Casares lembra que a loita contra a contaminación por microplásticos figura entre as prioridades da Comisión Europea.

Bruxelas di que lle corresponde a España xestionar os "impactos adversos" dos pellets

A Comisión Europea sinalou hoxe que son as autoridades nacionais as encargadas de xestionar no inmediato as verteduras de pellets de plásticos como o ocorrido en España, mentres Bruxelas traballa en medias a medio e longo prazo para reducir a contaminación por microplásticos.

"A Comisión é moi consciente dos impactos adversos da contaminación por microplásticos e en particular a perda de pellets de plástico no medioambiente", dixo o portavoz de Medio da Comisión Europea, Adalbert Jahnz.

Pola súa parte, a Xunta seguirá colaborando cos concellos na retirada dos pellets e tamén nas reclamacións económicas á empresa armadora. Asegurouno o vicepresidente primeiro, Diego Calvo.