Ribera asegura que lle custou "ata catro chamadas" localizar a Mazón na tarde da DINA

A vicepresidenta terceira e ministra para a Transición Ecolóxica e o Reto Demográfico, Teresa Ribera, asegurou que na tarde da DINA custoulle "ata catro chamadas" localizar o presidente da Generalitat Valenciana, Carlos Mazón.

Segundo relatou en declaracións ao programa Hora 25 da Cadena Ser, avisou o secretario de Estado de que "a situación era moi crítica" e inmediatamente tratou de falar con Mazón.

"Díxome algo así como que ía todo ben, pero esta tarde precipitouse todo. Descúlpame, chámote en 10 minutos, agora non podo falar e loxicamente non me volveu chamar", dixo.

Ribera asegurou que tiñan toda a información e que lle preocupa ata que punto ante "unha alerta tan grave, alguén pode considerar que non é relevante ou que poida agardar".

"Eu creo que isto pon de manifesto que temos que pensar de que maneira reforzar mellor, pero tamén temos que pensar no dano que ocasiona quen tenta xerar descrédito destas institucións que teñen unha misión tan importante", engadiu.

Defendeu o funcionamento do Estado das autonomías e considerou que a cuestión "non é se funciona o Estado autonómico ou non", senón "se funciona ou non Mazón ou se Feijóo está de acordo ou non co que fai Mazón".

Ribera defendeu o labor do seu ministerio, da Axencia Estatal de Meteoroloxía e das confederacións xeográficas.

Réplica de Mazón

O presidente da Generalitat Valenciana, Carlos Mazón, replicoulle na súa conta de X amosando unha mensaxe da vicepresidenta das 20:20 horas dese día e pedindo "basta de manipulacións".

Basta de manipulaciones.
Este SMS, a las 20:20h después de enviar la alerta y sin cobertura en el CECOPI.
Eso es lo que ocurrió. https://t.co/UYJ16JlPOa pic.twitter.com/VtX36bENTU

— Carlos Mazón (@carlos_mazon_) November 8, 2024