Ribera defende que o desconto de 20 céntimos por combustible funciona "con total normalidade"

A vicepresidenta terceira e ministra para a Transición Ecolóxica Teresa Ribera cre que o desconto de 20 céntimos polo combustible "está funcionando con total normalidade" grazas ao esforzo "moi importante" da Administración e dos operadores privados.

Nunha entrevista con EFE, Ribera destacou o traballo "inmenso" do Ministerio de Facenda e a Axencia Tributaria á hora de pór en marcha este mecanismo e de canalizar os anticipos dos descontos aos titulares das estacións de servizo, e lembra que, mentres Francia "aprobou" unha medida parecida que tardou máis dun mes en poder aplicar, aquí fíxose case de maneira inmediata".

A vicepresidenta terceira do Goberno referiuse aos problemas que, durante a fin de semana, obrigaron a pechar unhas 200 gasolineiras que non sabían como aplicar esa rebaixa no plano fiscal e contable, ou as que o sistema non recoñecía como beneficiarias dos anticipos. 

"Hai que velo en detalle, porque pode que sexan estacións novas e que, por tanto, non exista unha base dos seus datos de consumo do ano pasado na Axencia Tributaria", manifestou a ministra, que admitiu que "pode haber tamén un desfase entre os datos das pequenas estacións, porque, ás veces, canto máis pequena é, máis difícil é o seguimento concreto da información".

Confía en que Alxeria cumpra cos seus compromisos de gas con España

Teresa Ribera amosouse confiada en que Alxeria cumpra cos seus compromisos en materia de subministración de gas en España, xa que é un país "sólido, solvente" e "fiable".

"Na media en que é un país fiable e que nunca xamais tivemos indicio de que vaia faltar aos seus compromisos, podemos estar tranquilos e seguros", manifestou a vicepresidenta terceira.

A ministra para a Transición Ecolóxica pronunciouse neste sentido ao ser preguntada polas declaracións do conselleiro delegado de Sonatrach Toufik Hakkar en que abría a porta a revisar os prezos do gas só a España, que se producen tras o cambio de posición española no contencioso do  Sáhara Occidental.

Ribera lembrou que as compañías españolas están a negociar coa empresa alxeriana desde o mes de outubro.

"Tocaba revisión (...) e creo que, como veño insistindo en distintos formatos, tanto cos colegas alxerianos coma con empresas españolas, canto antes cheguen a un acordo en revisión de prezos mellor", remarcou.

Lamenta que algunhas eléctricas non reaccionasen "de forma acorde coa realidade social"

A vicepresidenta terceira lamentou que algunhas empresas eléctricas non reaccionasen" de maneira acorde coa realidade social" e acusounas de intentar "facer descarrilar" a proposta de España e Portugal para desacoplar o prezo do gas do da luz e baixar o seu custo.

Ribera manifestou que algúns consideran que co  mecanismo que España e Portugal presentaron á Comisión Europea, que propón limitar a 30 euros o prezo do gas destinado a produción eléctrica nos mercados grosistas deses países, "perden uns ingresos fantásticos e están xa intentando facer descarrilar esta proposta, e lamentámolo".

"Canta máis marxe de beneficio obteñen aos prezos actuais, máis protestan", subliñou Ribera, que se amosou "decepcionada" con estas compañías, "que tiñan marxe para ser máis razoables".

Destacou que esas compañías "non puideran nunca xamais alegar que esperaban uns retornos, uns beneficios, uns prezos como os que estamos vivindo nestas semanas", e remarcou que o interese do Goberno "debe estar en defender o interese dos consumidores, non o interese das grandes empresas".