Ringleiras de estudantes nas inmobiliarias de Santiago para alugar un piso

Superados os exames, o alumnado de Santiago afronta a reválida de atopar un piso de alugueiro. É unha misión complicada que se repite a principios de xullo todos os anos. "Hai pouca oferta, cara, e moitas vivendas non están nas mellores condicións", resume un mozo.

Madrugar ten premio

A inmobiliaria levanta a reixa ás dez da mañá pero na rúa hai persoas desde as cinco. "Nós vimos de Vigo. Chegamos ás sete e media e xa había xente aquí", di unha moza. "A primeira hora pasamos moito frío e agora xa vai calor", comenta outra.

Os primeiros grupos saen para ver os pisos. Os axentes organízanse por zonas e número de habitacións. Hai tanta demanda e tan pouca oferta que non hai marxe para a indecisión. "Se vas nun grupo e o primeiro o quere, cólleo. Se queres pensalo ou falta un compañeiro e prefires pensalo, ofrécenllo ao segundo, e, se lle gusta, xa llo conceden", conta unha rapaza.

As ringleiras de estudantes cerca das inmobiliarias repítense todos os anos en xullo

Prezos e condicións

Os estudantes acoden ás inmobiliarias cunha idea determinada pero moitos mudan as súas preferencias. Unha moza di que busca un piso de dúas habitacións pero que a estas alturas colle un de tres ou catro porque é moi complicado". 

A oferta escasa, as malas condicións dalgunhas vivendas e os prezos altos son as queixas de case todos. Un piso de dúas habitacións supera os 500 euros e un de catro, os 1.000 euros.