Roberto Tojeiro e Rodrigo Díaz asumen a dirección de Reganosa tras a súa reorganización

Roberto Tojeiro Rodríguez e Rodrigo Díaz Ibarra asumiron a dirección de Reganosa, en plena reorganización, e substitúen ao ata o de agora presidente e director xeral, Carlos Collantes e Emilio Bruquetas.

Reganosa informou este mércores a través dun comunicado que, co obxectivo de afianzar o seu crecemento e impulsar proxectos de transición ecolóxica, realizouse unha operación corporativa de reorganización.

Así, a matriz do grupo enerxético, Reganosa Holdco, toma o control completo sobre as principais sociedades ao adquirir a porcentaxe de Regasificadora do Noroeste SA que aínda non lle pertencía, é dicir, un 15 % que era propiedade da xaponesa Sojitz.

Alcanza desta forma a propiedade do 100 % do capital, como xa o facía en Reganosa Servizos e Reganosa Asset Investments.

O accionariado intégrano a Xunta de Galicia, cun 28,60 %, o Grupo Gadisa (59,64 %) e Sonatrach (11,76 %), polo que hai maioría galega na corporación.

Roberto Tojeiro, como presidente, e Rodrigo Díaz, como director xeral, continuarán o proxecto de crecemento e diversificación do grupo co obxectivo que a compañía se consolide como referente mundial en xestión de infraestruturas enerxéticas, á vez que materializa os seus proxectos de transición para contribuír á consecución dunha economía verde, inclusiva e dixital.

Entre os seus proxectos atópase a construción da primeira gran planta de hidróxeno renovable de Galicia nas Pontes de García Rodríguez.