Sanidade regula o cánnabis medicinal para enfermidades con dor crónica e persistente
Sanidade regula o cánnabis medicinal para enfermidades con dor crónica e persistente
As patoloxías para as que se permitirá son a epilepsia refrectaría, a espasticidade por esclerose múltiple, as náuseas e vómitos por quimioterapia e a dor crónica refractaria
A prescrición estará limitada a médicos especialistas e os preparados elaboraranse en servizos de farmacia hospitalaria
Imaxe de arquivo dun cultivo de cánnabis (Europa Press)
O Ministerio de Sanidade sacou este luns a consulta pública o borrador do real decreto que regula o uso medicinal do cánnabis que se permitirá en patoloxías con evidencia científica do seu beneficio terapéutico e en enfermidades con dor crónica e persistente que non se alivia cos tratamentos habituais.
Nun comunicado, Sanidade informou de que as patoloxías ás que se refire o texto son a espasticidade por esclerose múltiple con rixidez e espasmos musculares, as formas graves de epilepsia refractaria, as náuseas e vómitos por quimioterapia e a dor crónica refractaria que persiste cos fármacos máis comúns.
Esta lista de indicacións pode ampliarse ou modificarse, no trámite de audiencia, en función da evidencia científica e as decisións regulatorias futuras.
O texto tamén establece un rexistro para asegurar o seguimento e calidade dos preparados estandarizados de cánnabis utilizados na elaboración de fórmulas maxistrais.
Ademais, a prescrición limitarase a médicos especialistas e as fórmulas maxistrais de preparados de cánnabis elaboraranse en servizos de farmacia hospitalaria para asegurar un seguimento farmacoterapéutico adecuado.
Esta norma, que responde á petición da subcomisión de Sanidade creada para analizar a regulación do cánnabis medicinal a pedimento da Comisión de Sanidade e Consumo, busca facilitar o acceso de preparados estandarizados de cánnabis a pacientes nos que os medicamentos autorizados non foron eficaces.
A Axencia Española do Medicamento e Produtos Sanitarios (AEMPS) publicará a monografía deste uso no formulario nacional para fórmulas maxistrais de preparados estandarizados de cánnabis. A monografía incluirá a acción e indicacións legais recoñecidas para estes tratamentos.
Os laboratorios fabricantes dos preparados deberán cumprir as normas de correcta fabricación dos medicamentos da UE, e asegurar boas prácticas de distribución por parte dos seus provedores, auditalos regularmente e documentar a cadea de subministración de cada material.
Só poderán fornecerse estes preparados a servizos de farmacia hospitalaria ou para exportación.
Deberán estar rexistrados no rexistro público da AEMPS creado para ese efecto. As fórmulas maxistrais usaranse cando non haxa medicamentos autorizados ou estes non se axusten ás necesidades do paciente.
A prescrición limítase ao médico especialista. O médico deberá avaliar periodicamente a utilidade e seguridade do tratamento e considerar o seu cesamento se non hai beneficio ou a relación risco-beneficios é desfavorable.
