Segunda xornada de folga do servizo de asistencia en terra de Iberia

Iberia asegura que a folga dos seus persoal do servizo de asistencia en terra está a ter un seguimento de menos do 16 %.  Rebaixa a puntualidade dos voos ao 77 %, pero por meteoroloxía adversa, e só dá conta de incidentes coas maletas en Gran Canaria, onde admite que os primeiros servizos saíron sen elas.

No aeroporto de Barcelona atopamos pasaxeiros aos que tampouco lles cargaron as maletas.

"Levamos unha hora esperando maletas. Non chegaron. Dinme que as mandan no voo que vén en dúas horas e media. Déronme un papeliño e aconséllanme que volva en dúas horas e media ou máis tarde polo almacén ou que mas mandan á casa, pero que non saben cando", explica un viaxeiro.

No mesmo aeródromo, outros viaxeiros quéixanse de que perderon o voo porque llelo adiantaron sen aviso.

"Nós compramos un billete de avión para as tres da tarde. Chegounos un correo de que o cambiaban para as nove pola folga. Chegamos e cámbianolo para as once. Imos mirar unha hora antes e pon que está pechada a porta. Queixámonos, porque a pantalla non funcionaba. E nada. Agora temos que comprar un voo e imos gastar 128 euros por persoa máis 52 pola maleta", relata unha moza.

Os sindicatos, que elevan o seguimento da folga ao 80 %, aseguran que onte quedaron 750 maletas sen cargar nos avións e que este será un inconveniente que irá a máis, ao se acumular as equipaxes nos aeroportos.

No de Madrid, varios pasaxeiros dicían que evitaran facturar as súas bolsas para previr.

"Non a soltamos; metémola en cabina e non a soltamos", di un mozo.

"Porque agora temos un AVE a Zaragoza e se no la deixan por aí non podemos marcharnos", explica un home.

A convocatoria desta folga de catro días levou a Iberia a cancelar 444 voos con antelación, 46 deles servizos entre Galicia e Madrid. En concreto, para esta segunda xornada de mobilizacións, canceláronse 13 voos nos aeroportos galegos.