Seis falecidos este domingo en varios accidentes nas estradas españolas

Xornada complicada nas estradas españolas nesta primeira fase da operación saída de verán. Tres persoas, dous homes de 33 e 48 anos e unha muller de 23, faleceron este domingo nun accidente de tráfico no municipio de Benasque, en Huesca. O turismo en que viaxaban saíu da estrada, por causas que aínda se están a investigar. O vehículo caeu desde unha ponte uns vinte metros ata o río Ésera. 

As vítimas, traballadoras dun restaurante da zona, regresaban das festas patronais. A complicada orografía do lugar obrigou a intervir ao Grupo de Rescate de intervención de Montaña da Garda Civil e aos bombeiros para rescatar os corpos dos falecidos. O concello de Benasque decretou un minuto de silencio en memoria das vítimas.

E en Castellfollit del Boix, en Barcelona, dúas persoas faleceron e outras dúas quedaron en estado crítico noutro accidente con tres vehículos implicados. Por causas que se están a investigar produciuse unha colisión frontal entre un turismo e unha furgoneta, na que tamén se viu afectado un terceiro vehículo. Ademais dos dous falecidos e dos feridos críticos, os servizos de emerxencia atenderon catro persoas máis. Ao lugar do accidente desprazáronse 8 ambulancias e 2 helicópteros.

E en Madrid, un home de 41 anos faleceu nun accidente de moto na A-6 en sentido de entrada a Madrid. Impactou contra unha barreira de seguridade. Caeu uns cinco metros de altura. Sufría varios traumatismos, entre outros torácico e cranioencefálico. Os servizos de emerxencia non puideron reanimalo.