Sen rastro dos tres policías filipinos acusados do asasinato do empresario coruñés Diego Bello

Pasaron cinco meses desde de que un xuíz filipino ordenara a detención dos tres policías acusados de asasinaren a tiros a Diego Bello, pero seguen en paradoiro descoñecido. A familia está convencida de que as propias forzas de seguridade filipinas están protexendo os acusados.

¨Nós temos informacións de xente que vive en Siargao que nos din que eles seguen alí ocultos e que a Policía Nacional filipina non fai nada por detelos a pesar de que saben onde están. Estase producindo unha obstrución á xustiza por parte das forzas de seguridade do país”, explica Francisco Lafuente, portavoz da familia de Diego Bello.

Diego Bello foi asasinado a tiros diante da súa casa en Siargao, unha pequena illa das Filipinas onde residía desde 2017 e onde rexentaba varios negocios relacionados coa paixón da súa vida, o surf.

"Parece que a súa presenza alí e os seus negocios -estáballe empezando a ir ben- molestaron a alguén co suficiente poder como para encargar algo así", asegura Francisco Lafuente.

A familia de Diego vai solicitar o traslado do caso a un xulgado da capital do país, Manila.

"Queremos evitar que o xuíz poida recibir presións e tamén darlle máis visibilidade ao caso", di o portavoz familiar.

Os policías aduciron que lle dispararon a Diego despois de que este sacara unha arma cando o ían deter nunha operación antidroga, unha acusación que se demostrou falsa. A familia vai solicitar unha orde de detención internacional por se os policías acusados decidisen abandonar as Filipinas. Din que non van parar ata que se faga xustiza.