A luz volve subir e o prezo medio supera os 194 euros o megawatt hora

O prezo medio da luz para a clientela de tarifa regulada vinculada ao mercado almacenista sobe este domingo un 9,68 % con respecto á xornada anterior. Segundo datos do Operador do Mercado Ibérico da Enerxía (OMIE), sitúase nos 194,64 euros o megawatt hora.

Este prezo é o resultado de sumarlle a media da poxa no mercado grosista á compensación que pagará a demanda ás centrais de ciclo combinado pola aplicación da excepción ibérica.

Na poxa, o denominado pool, o custo medio sitúase nos 131,61 euros/MWh. O máximo rexistrarase entre as 21:00 e as 22:00 horas (202,28 euros/MWh) e o mínimo, de 61,01 euros/MWh, entre as 15:00 horas e as 16:00 horas.

A este prezo súmase a compensación de 63,03 euros/MWh ás gasistas que ten que ser aboada polos consumidores beneficiarios da medida, os consumidores da tarifa regulada (PVPC) ou os que, malia estaren no mercado libre, teñen unha tarifa indexada.

En ausencia do mecanismo da excepción ibérica, o prezo da electricidade en España sería de media uns 249,16 euros/MWh, o que supón 54,52 euros/MWh máis que coa compensación para a clientela da tarifa regulada, que pagarán así un 21,88 % menos de media.