Sobe a 43 a cifra de falecidos polo impacto do furacán Otis en Acapulco

A 43 subiu a cifra de falecidos, ademais de 36 desaparecidos, provocados polo devastador impacto do ciclón Otis, que entrou como furacán de categoría 5 o pasado mércores en Acapulco, un dos principais destinos turísticos do país, informou este domingo o Goberno de México.

"Desafortunadamente e de acordo á información da Fiscalía Estatal temos 43 persoas falecidas e 36 desaparecidas ou non localizadas; é unha cifra preliminar e estamos a reforzar o programa de procura. Onte localizamos con vida varias persoas", informou a gobernadora do estado de Guerrero, ao sur do país, Evelyn Salgado ao presidente Andrés Manuel López Obrador.

Salgado precisou que das 43 persoas falecidas, 33 son homes e dez mulleres, e dixo que se traballa na localización de máis persoas.

O informe de vítimas foi lento, xa que a catro días do azoute de Otis as autoridades non chegaron a todas as zonas afectadas polo furacán. Practicamente toda a Costa Sur de Guerrero quedou incomunicada por preto de 24 horas tras o impacto de Otis.

Por outra banda, López Obrador informou que dos 10.000 postes de enerxía eléctrica que derrubou o furacán, os traballadores da Comisión Federal de Electricidade (CFE) xa restableceron 3.211.

"A pesar de que o furacán tombou practicamente todos os postes de luz de Acapulco, xa se reinstalaron 3.211, e con plantas eléctricas provisionais os directivos da CFE dixeron que para mañá (luns) pola noite van ter electrificado de novo todo Acapulco", afirmou.

Ademais, dixo que terminarán por completo o traballo para os primeiros días de novembro, "pero mañá á noite, como moi tarde o martes, haberá enerxía eléctrica nas casas de Acapulco. Isto vai permitir que empecen a distribuír as estacións de gasolina, hai 70 en Acapulco, e á media que se vai electrificando reactivaranse máis servizos".