Sol Vázquez: "As reclamacións polo prezo da enerxía incrementáronse máis dun 148 % respecto de 2021"

Cada vez son máis os consumidores que loitan polos seus dereitos, acoden a defendelos onde faga falta e cada vez son máis o que poñen queixas e tamén os que denuncian, segundo o rexistro de consultas de queixas que atende o Instituto Galego do Consumo e da Competencia (IGCC).

Conforme ao balance do 2022, este organismo dependente da Consellería de Economía, Industria e Innovación, tramitou 23.210 reclamacións, fronte ás 18.621 do ano 2021, a unha media de 63 requirimentos cada día, o cal supón un 25 % de incremento.

Este venres estivo na entrevista do Bos días Sol Vázquez, xerente do Instituto Galego do Consumo e da Competencia, para falarnos dos servizos que reciben máis reclamacións e dos programas de concienciación que vai desenvolver o IGCC para concienciar os consumidores da necesidade e dos dereitos que teñen fronte ao que consideren as empresas que prestas os servizos.

Salienta Sol Vázquez que os consumidores cada vez son máis conscientes dos seus dereitos e cada día poñen máis reclamacións, como reflicte o informe de 2022 do seu departamento.

"As reclamacións polo prezo da enerxía incrementáronse más dun 148 % respecto de 2021 e unha de cada tres reclamacións ten que ver coa factura da luz e do gas. Todo o que é a subministración de enerxías está a preocupar a todos os fogares e cada vez a xente se anima máis a reclamar e está a mirar os seus recibos".

As reclamacións contra as compañías eléctricas desbancaron por primeira vez as motivadas polos operadores de telefonía

O informe de 2022 revela que as reclamacións contra as compañías eléctricas desbancaron por primeira vez as motivadas polos operadores de telefonía, ata entón líderes en ranking de queixas dos galegos. Pero a crise enerxética e a alza de prezos provocaron 8.869 protestas contra o recibo da luz, concretamente o 38,2 %, unha media de 24 reclamacións ao día.

"No Instituto Galego de Consumo estamos facendo distintas campañas informativas a través dos distintos Concellos que nolo van solicitando, para que os consumidores poidan entender as facturas, tamén se dan charlas nos colexios, porque os rapaces son un vehículo perfecto para chegar ás casas. A xente na maioría dos casos reclama polo importe, que en ocasións chega a superar o 400 %, do que reciben normalmente".

Comezan a denunciarse as políticas comerciais moi agresivas e cambios unilaterais do contrato

Explica Sol Vázquez que tamén comezan a denunciarse "as políticas comerciais moi agresivas, que nos están a chamar constantemente ofrecendo descontos que despois dan problemas. Tamén se están a detectar cambios unilaterais do contrato; ese tipo de cousas son reclamables e son as que están protagonizando esas máis de 8.800 persoas que puxeron as reclamacións que nos están chegando".

Lembra a xerente do IGCC que poñer unha reclamación é gratuíto e que está ao dispor do consumidor para todo tipo de servizos.

As eléctricas foron as empresas más sancionadas en 2022

As empresas máis sancionadas en 2022 foron as eléctricas, "tanto no numero como no importe; hai máis de 590 expedientes acondicionadores por un importe de preto de cinco millóns de euros, dos 13,3 millóns de euros que puxemos en total en sancións en 2022. En 2021 recadáronse en sancións 6,8 millóns de euros, pero en 2022 houbo máis reclamacións e polo tanto máis sancións, un 43 % de incremento".

"O importante non é a sanción en si, é que a través dela o cliente recibe un pago polo seu recibo excesivo e iso tradúcese en satisfacción polo que reclamou, e iso para nós é o máis importante, porque cando chega enfadado por esa sensación de indefensión por non ter ao outro lado do fío do teléfono alguén que o escoite. Polo menos teñen unha vía para remediar esa situación".

Novo proxecto de atención ao cliente

Agora estase a tramitar un novo proxecto de atención ao cliente, explica Sol Vázquez, que vai regular "os tempos de espera, na persoa que tes ao lado; estamos na volta a presencialidade a atender dunha maneira personalizada as persoas".

As revisións dos produtos do mercado son un traballo invisible pero moi importante, di a xerente do IGCC

"É un traballo que non se ve, pero as persoas vense beneficiadas por que os produtos que mercan teñan unha seguridade. Este ano retiramos 116 produtos do mercado, láseres, xoguetes, produtos de puericultura entre outros, para garantir que os produtos sexan seguros, especialmente no caso dos máis pequenos".