Sumar admite fallos de prevención e de detección con Errejón ante os casos de acoso

O voceiro de Sumar, Ernest Urtasun, recoñeceu este sábado que a xestión interna das denuncias de varias mulleres por seren vítimas de violencia sexual por parte de Íñigo Errejón provocou que crebase "a confianza de moita xente" na organización.

Nunha comparecencia ante os medios, a executiva de Sumar, a través de Urtasun, púxose ao dispor das vítimas para axudalas no que decidan, así como das institucións e organismos que requiran da colaboración da organización para investigar os feitos denunciados.

Destacou o tamén ministro de Cultura que a xestión tiña que facerse "mellor", que hai que mellorar sistemas internos de "detección e prevención" de condutas machistas, e salientou que se na dirección coñecesen a información desta semana contra Errejón antes, sería destituído moito antes.

Yolanda Díaz non acudiu á coimparecencia por outro compromiso institucional, explicou Urtasun, pero "foi a primeira en pedirlle explicacións a Errejón" asegurou.

A comparecencia prodúcese dous días despois de que Errejón anunciara a súa dimisión entre acusacións de agresión sexual.

Sostén que Más Madrid debe dar as súas explicacións

Urtasun evitou profundar na actuación de Más Madrid, que nun comunicado admitiu que coñecía unha denuncia de xuño de 2023 sobre un tocamento non consentido en Castelló e que este venres cesou a Loreto Arenillas pola súa intermediación coa muller denunciante.

Arenillas renunciou como deputada madrileña e acusou o seu partido de empregala como "chibo expiatorio", apuntando ademais á actual portavoz na Asemblea de Madrid, Manuela Bergerot, que entón era secretaria de Organización, e que segundo a xa exdiputada madrileña non elevou o caso aos órganos do partido.

Cuestionado sobre se Bergerot ou Mónica García deben dimitir, sinalou que é Más Madrid quen debe dar explicacións, á vez que apuntou que ante o caso de Errejón actuaron da man, de forma coordinada e na mesma dirección.

Ademais, en varias ocasións negou que Sumar tivese antes información respecto a Errejón.

Sumar poñerá en marcha protocolos e formará aos seus cargos

Sumar ofreceu a súa colaboración ás institucións e organismos que a requiran e continuará co procedemento interno para esclarecer "calquera feito contrario aos valores feministas". Ademais, nunha rolda de prensa na que tamén participou a secretaria de Feminismos, Amanda Andrades, anunciou que establecerá canles e mecanismos de reparación, apoio e acompañamento ás vítimas.

Tamén se culminará a posta en marcha dos protocolos de prevención e abordaxe ante acoso e agresións sexuais e comportamentos machistas, lgtbifóbicos, racistas ou discriminatorios.

Como cuarta actuación, Sumar desenvolverá un programa de formación sobre violencias machistas, acoso e violencia sexual que será obrigatorio para dirixentes e cargos públicos e no que xa se estaba traballando.