Os acusados de apuñalar e dispararlle a un mozo en Ribeira recoñecen os feitos e chegan a acordo

O xuízo contra dous homes acusados de apuñalar e dispararlle a un mozo en Ribeira e ameazar de morte a outro, así como contra as dúas persoas que os encubriron e tentaron axudalos a fuxir a Portugal, suspendeuse tras negociar as partes coa Fiscalía un acordo de conformidade que, á espera do pagamento acordado da responsabilidade civil (60.000 euros), ratificarase o próximo 17 de marzo.

En declaracións aos medios, a avogada de dous dos acusados, Carmen Ventoso, detallou que o acordo alcanzado con Fiscalía e acusación particular ten como condicionante o pagamento da responsabilidade civil.

En concreto, a acusación solicitaba 400.000 euros e o Ministerio Fiscal 85.000, mentres que este mércores acordouse que se aboe un total de 60.000 euros. Deles, segundo explicou a letrada, 30.000 xa foron consignados na conta do xulgado e os outros 30.000 terían de prazo ata a data para a que se pospuxo o xuízo.

Ademais do pagamento da responsabilidade civil, o acordo tamén fixa que se reduza a pena de prisión dun dos acusados de 20 anos de prisión e expulsión a sete anos e sen expulsión. No caso do segundo dos acusados, para o que se pedían 10 anos, a pena quedaría en cinco.

Así, a espera de que se consigne na conta do xulgado o que resta ata 30.000 euros, o xuízo quedou suspendido ata o 17 de marzo. De abonarse a cantidade, non se celebraría e ditaríase sentenza de conformidade, tal e como manifestou a avogada.

"En caso de non aboarse, si se celebraría, pero, en principio, hai vontade de afrontar a responsabilidade civil, porque de feito xa se consignou diñeiro na conta do xulgado", asegurou Carmen Ventoso, que, aínda que non valorou que farán os outros dous acusados, apuntou que "en principio habería posibilidade de conformarse".

Escrito da Fiscalía

Os feitos remóntanse á madrugada do 21 de maio de 2023, cando os dous principais acusados, de orixe dominicana, tiveron unha discusión cunha das vítimas na zona do Malecón. Tras esa lea foron ao seu domicilio para buscar unha pistola e un coitelo e regresaron buscar esta persoa, á que ameazaron con matala apuntándolle coa arma.

Un dos procesados chegou a efectuar un disparo con intención de acabar coa súa vida, pero non chegou a darlle porque a vítima logrou esquivalo.

Foi nese momento cando interveu o segundo prexudicado, amigo da primeira vítima, que tratou de impedir que os agresores o perseguisen. Tras un forcexo, resultou "gravemente ferido" ao ser apuñalado en catro ocasións na zona lumbar por un dos acusados. O outro, pola súa banda, apuntouno coa pistola e disparou, feríndoo no costado esquerdo. A bala atravesoulle os pulmóns e quedou aloxada no fígado.

Restos de sangue no lugar dos feitos

Os procesados, segundo o escrito fiscal, desfixéronse entón das armas (deixaron o coitelo na propia rúa e a pistola foi lanzada ao mar, onde foi localizada polos axentes días máis tarde) e contactaron con dous coñecidos para que os ocultasen noutra vivenda e os trasladasen ata O Porto para "poder abandonar o país e evitar ser capturados pola Policía".

Finalmente foron interceptados e detidos por axentes da Policía na peaxe da AP-9 á altura do Porriño.

O Ministerio Público considera os feitos constitutivos de dous homicidios en grao de tentativa, dun delito de tenencia ilícita de armas (xa que carecían de permiso) e dun delito de encubrimento. Por iso, pedía para o principal acusado, autor dos disparos que impactaron nunha das vítimas, 20 anos de prisión, mentres que o outro se enfronta a 10 anos de cárcere. Para os encubridores reclamaba tres anos de prisión e para o ferido, que tivo que permanecer ingresado na UCI, solicitaba unha indemnización de algo mais de 85.000 euros.