Temor dunha familia de Lugo pola presenza dun niño de velutina na vivenda
Temor dunha familia de Lugo pola presenza dun niño de velutina na vivenda
O enxame leva máis dun mes instalado nun pendello
Non poden acceder á horta nin encher a piscina
Manuel olla impotente cara á horta e as froiteiras da súa leira, ás que non pode acceder porque a presenza de velutinas pon en perigo a súa vida. Este veciño de Teixeiro, en Lugo, descubriu un niño do insecto asiático no interior do pendello onde garda os apeiros e situado no acceso á leira e a poucos metros da vivenda familiar. O niño non deixa de medrar porque nas froiteiras teñen todo o alimento que precisan.
A familia tampouco pode refrescarse na piscina porque a auga faría de reclamo para as velutinas, nin atender o xardín sen temor a sufrir ataques do insecto. O propio Manuel é alérxico ás picadas e ten unha neta de curta idade, polo que viven co temor de que aconteza algunha desgraza por causa da vespa asiática. Ademais, levan semanas reclamando que os especialistas acudan retirar o niño pero de momento toparon cun muro administrativo que o fixo imposible.
A avespa velutina leva trece anos en Galicia e xa se considera endémica. Este ano retiráronse máis de 2.500 niños pero a súa presenza vai a máis e pon en risco a colleita de mel en Quiroga ou na Mariña.
