Momentos de tensión, e máis policía, ás portas da Audiencia Provincial de Lugo

De novo vivíronse momentos de tensión ás portas da Audiencia Provincial de Lugo, na segunda xornada do xuízo polo asasinato da pequena Desirée. A familia da vítima e mais os achegados volveron berrarlle "asasina" a Ana Sandamil, acusada de matar a súa propia filla.

Desta volta, incrementouse a escolta da presunta parricida, coa presenza de varias patrullas policiais e de efectivos da Sección de Intervención Rápida da Garda Civil.

Sobre as declaracións da nai da vítima e dos seus familiares, o pai de Desirée Leal mostrouse indignado.

José Manuel Leal, pai da vítima: "Que a min ese monstro me diga que non se acorda de nada e que avoa diga que non viu sangue, nin viu nada, non lle entra na cabeza a ningún ser humano. Que por que tiñan que chamar a Garda Civil? Que querían? Enterrar a miña filla detrás da casa?"

A defensa de Ana Sandamil pide unha eximente completa co fin de que saia absolta e reciba tratamento psiquiátrico, de ser necesario. Pola súa parte, as acusacións tratarán de demostrar que si era consciente do que facía no momento en que, presuntamente, asasinou a súa filla.

Manuel Ferreiro, avogado da acusación particular: "O certo é que o médico o único que documenta, e o psiaquiatra nese momento, é unha depresión, que é o que din algunhas das testemuñas. Contamos con que hoxe esas declaracións vaian nesa dirección.".

Francisco José Lago, avogado da acusación popular: "Hoxe declaran algúns técnicos do servizo sanitario, que creo que van ser bastante claros e que xa declararan con anterioridade".

Ademais dos sanitarios, ao longo da xornada prestarán declaración o groso das testemuñas do caso. Mañá será a quenda dos gardas que acudiron ao lugar do crime.