Tensión no barrio de Recimil, en Ferrol, polo enfrontamento entre dous clans

Incendio nas Casas Baratas de Recimil, o segundo en pouco máis de 24 horas, o que dispara erroneamente o ruxerruxe entre a veciñanza.

"O incendio que houbo aí atrás non ten nada que ver. Puxen unha tixola no lume", explica a afectada.

"É un incendio caseiro normal, que sucede en moitas ocasións. Para nada cremos que tivera que ver", confirma Alejandro Fernández, cabo de bombeiros de Ferrol.

O incendio do domingo foi outra cousa: a vinganza polo enfrontamento entre dous clans de no que dúas persoas acabaron no hospital. Houbo catanas, machetes, barras de ferro e mesmo un intento de atropelo cunha furgoneta que apareceu en fronte da casa dun dos implicados. Precisamente a casa que ardeu.

"Quixeron queimar unha das casas pero entre eles está o asunto: uns que veñen de non sei onde e outros os que viven aquí e son moi agresivos todos", conta unha veciña.

No momento do incendio, a vivenda estaba baleira.

"Nese momento estaba baleira pero realmente estaba ocupada pero esas persoas tiveron que marchar", relata a muller do piso que ardeu hoxe.

A veciñanza está farta e atemorizada. Non se atreven a dar a cara e recoñecen que ás veces prefiren mirar para outro lado. 

"Por detrás todos falamos e dicimos pero temos moito medo. Agora cando escoito as leas pecho todo. Xa non quero saber nada", lamenta a mesma veciña.

Tampouco os xitanos están conformes coa situación porque se senten no disparadoiro.

"Déixanos quedar nunha mala posición a todos porque por un, pagamos todos", lamenta unha moza.

"Nós non temos nada con ninguén, nin leas nin nada", insiste outro.

A policía mantén unha investigación aberta pola pelexa do xoves e por posibles vinganzas futuras. De momento, non hai detidos.