Trasfega nos camposantos unha semana antes da festividade de Defuntos
Trasfega nos camposantos unha semana antes da festividade de Defuntos
Moitos acoden estes días para limpar as sepulturas, escapando das aglomeracións dos días previos á festividade
Acudir ao camposanto en Defuntos é unha das tradicións máis arraigadas en Galicia
Caldeiro en man, baeta e vasoira, é a imaxe que máis se repite estes días nos camposantos galegos. Queda unha semana para a festividade de Defuntos e hai que amañar as sepulturas.
"Á parte de todo o ano é un día que che dá mágoa ver a tomba sen flores"; di un home, e unha muller engade "hai que andar e o último día dáselle un repaso".
Son os máis previsores, xa saben que "traballo feito non mete apuro", e vindo antes tamén evitan as multitudes.
"A ela gustáballe vir ese día, faciamos o percorrido, era horrible, non me gustan as multitudes", conta unha muller.
O máis habitual é que cada familia acondicione a sepultura dos seus, pero duns anos para aquí cada vez é máis frecuente ver empregados de empresas de limpeza que se encargan deste traballo. Uns deles son Jordi e Luis, que este ano na súa axenda teñen unha trintena de encargos.
"Nós sacamos as herbas e o musgo, branqueamos as lápidas brancas e retiramos as flores vellas para que cando veñan poñan as novas lles quede bonito", explica Jordi, empregado dunha empresa de limpeza.
Acudir ao camposanto por Defuntos é unha das tradicións máis arraigadas en Galicia.
"Gústame cumprir por meus pais", di un home, e outro asegura: "Prometinlles que mentres vivise viría todos os anos"
Moitos cemiterios estes días amplían os seus horarios. É o caso do de Lugo, que desde este domingo abrirá en horario continuo, de nove e media a sete da tarde.
