Trasladan 15.000 exemplares de mexillón de río no leito do Miño en Lugo

Este é o momento en que os mergulladores se adentran no río para extraer os mexillóns. Examinan o leito con visores subacuáticos. En total queren trasladar entre 7.000 e uns 15.000 exemplares de dúas especies que están protexidas, pero non en perigo de extinción; son a Potomida littoralis e a Unio delphinus. 

"Os mergulladores van ir varrendo as zonas que temos acoutadas e van estar afectadas pola obra, van ir extraendo todos os exemplares que vaian encontrando para posteriormente facer un cribado e separar as dúas especies, e tamén por grupos de tamaño e poder facer a marcaxe e medición", explica o coordinador dos traballos de traslado, Daniel Garrido.

É un traballo moi minucioso que se fai de xeito manual e individual. Estiman que cada día trasladarán uns 600 exemplares. A función desta especie no río é filtrar a auga. Un individuo de 15 cm é capaz de filtrar ata seis litros de agua ao día.

O traslado dos mexillóns é necesario para poder facer a reparación do caneiro, estragado polas enchentes. "Unha das cousas que tamén é importante para manter estas especies non só é coidalas e trasladalas, tamén permeabilizar e manter a conectividade dos ríos. O xeito en que estas especies son capaces de reproducirse colonizando as branquias dos peixes", comenta o comisario da obra, Alberto de Anta.

O traslado ás zonas de destino faise no mesmo día. Os mexillóns envólvense en panos húmidos e refrixerados e lévanse en neveiras. Trátase dunha medida excepcional e pioneira: "Polo calado, pola extensión, pola importancia, é a primeira que se fai desta magnitude en toda España", asegura o presidente da Confederación Hidrográfica Miño-Sil, José Antonio Quiroga.

Son millóns o número destes exemplares no tramo urbano do río Miño.