Tres meses despois da morte violenta de Yoel Quispe declaran novas testemuñas nos xulgados

O crime de Yoel Quispe volveu aos xulgados da Coruña. Desta volta para tomarlles declaración a sete testemuñas.

"Sete testemuñas que había no día dos feitos, outros que non teñen relación directa cos feitos, coa pelexa que houbo ese día, senón con algúns dos investigados e a outros que colaboraron coa policía na identificación dos sospeitosos", explica Adrián Borrajo Rodríguez, o avogado da familia.

Polo momento hai tres acusados e só un, o presunto autor da coitelada mortal, permanece en prisión preventiva.

"Entendemos que hai máis implicados. Hai persoas que declararon perante a policía e tamén no xulgado que seguiron mallando en Yoel mentres un deles ía pola navalla coa que ao final lle deu esa coitelada", engade o avogado.

Coa finalidade de que prendan tamén estes últimos, familiares e amigos de Yoel concentrábanse ás portas do xulgado.

"Pasaron tres meses e non levanto cabeza. É moi duro perder un fillo do xeito en que mo mataron. Que investiguen a fondo. Só pido xustiza para o meu fillo. Que paguen todos os culpables", di Maritza Gomessosa, a nai de Yoel Quispe.

Está previsto que o 13 de maio novas testemuñas presten declaración nos xulgados coruñeses que axuden a esclarecer o crime de Yoel.